Turkmaniston “Ukraina Qurolli kuchlarining o‘qqa tutishi kuchaygani” sababli o‘z fuqarolarini Rossiyadan favqulodda evakuatsiya qilishga tayyorlanmoqda. Bu haqda “Xronika Turkmenistana” xabar berdi.
29-iyul kuni Turkmaniston Milliy xavfsizlik vazirligining 10 nafar xodimi va Ichki ishlar vazirligining 15 nafar xodimidan iborat guruh dengiz orqali Astraxanga yetib kelgan.
Ular rus aholi punktlarida yashovchi turkmanlarni vaqtincha o‘z vatanlariga qaytishga yoki xavfsizroq hududlarga ko‘chib o‘tishga ko‘ndirmoqchi bo‘lgan.
Vataniga qaytishni xohlovchilar mashinada Astraxanga olib ketiladi. Mudofaa vazirligiga turkman fuqarolarini Astraxandan Turkmanboshiga evakuatsiya qilish uchun ikkita kema tayyorlash topshirilgan. Turkmanboshidan ular samolyot yoki poyezdda doimiy yashash joyiga bepul yetkaziladi.
Astraxanga kelgan xavfsizlik xodimlari va diplomatlarning bir qismi keyinroq Moskvadagi Turkmaniston elchixonasiga borgan. Milliy xavfsizlik vazirligi va Ichki ishlar vazirligi xodimlari o‘q otish qurollari bilan qurollangan.
Turkmaniston Moskvaga parvozlarni to‘xtatdi
Turkmenistan Airlines aviakompaniyasi Ashxoboddan Moskvaga borish va qaytish parvozlarni to‘xtatdi.
Keyingi uch hafta davomida parvozlar bekor qilinadi. Aviakompaniya buning o‘rniga Qozonga parvoz qiladi.
“Moskva havo zonasidagi holat, shuningdek, parvozlar xavfsizligini taʼminlash maqsadida xavflarni baholash asosida 1-avgustdan boshlab Turkmaniston havo yo‘llarining Ashxobod–Moskva–Ashxobod reyslari to‘xtatiladi va Ashxobod–Qozon–Ashxobod yo‘nalishida amalga oshiriladi”, — deyiladi kompaniya xabarida.
Moskvaga dronlar hujumi: vaziyat qanday?
1-avgustga o‘tar kechasi Moskvaga yana dronlar hujum qildi. Ulardan ikkitasi shaharga yaqinlashganida havo mudofaasi tomonidan urib tushirildi. Uchinchisi avvalgi hujumda shikastlangan “Moskva Siti” biznes markazidagi binoga kelib urildi.
Avvalgi hujum 30-iyulga o‘tar kechasi yuz bergandi. Jumladan, Moskvaga uchta dron uchirilgan, ikkitasi “Moskva Siti” biznes markazidagi binolarga kelib tushgan. Dronlarning yana biri Moskva viloyatining Odinsovo tumanida urib tushirilgani aytilgan.
Bundan tashqari, 24-iyul kuni ham dron hujumi bo‘lgandi. O‘shanda Moskvadagi noturar joy binolar zarar ko‘rgan. Ulardan biri Rossiya Mudofaa vazirligi yaqinida qulagan.
May oyi oxiri va iyul boshida esa dronlar Rossiya poytaxtiga yaqinlashganda urib tushirilgan. BMT so‘nggi dron hujumini qoralab, fuqarolik obyektlariga hujum qilmaslikka chaqirgan.
Izoh (0)