Qirg‘iz—tojik chegarasining uchastkalaridan birida ikki davlat viloyatlari aholisi o‘rtasida konflikt yuzaga keldi. Tojikiston Milliy xavfsizlik davlat qo‘mitasi chegara qo‘shinlari hodisaga munosabat bildirdi.

Tojikiston tomoniga ko‘ra, taxminan soat 17:30 larda Vorux qishloq aholisiga tegishli 8 ta avtomashina to‘y uchun Isfara shahri tomon harakatlangan. Oq-Say qishlog‘iga kiraverishda Mersedes-Benz rusumli avtomashinani boshqarayotgan Qirg‘iziston fuqarosi tojikistonliklarning yo‘lini to‘sgan. Bunga Tojikiston fuqarosining avtomobillaridan biri uning harakatiga to‘sqinlik qilgani sabab qilib ko‘rsatilgan.

Ta’kidlanishicha, Qirg‘iziston fuqarosi mast holatda bo‘lgan, u hamyurti bilan mashinadan tushib, Tojikiston fuqarolarining transport vositalariga tosh otishni boshlagan. Oqibatda 3 ta avtomobil shikastlangan, 4 nafar Tojikiston fuqarosi yengil tan jarohati olgan. Voqea joyiga Tojikiston va Qirg‘iziston mahalliy hokimiyat va huquq-tartibot idoralari xodimlari yetib kelgach, muzokaralar olib borilgan va mojaroga barham berilgan.

Eslatib o‘tamiz, Qirg‘iziston tomoni Tojikiston fuqarolari mashinalarida Qirg‘iziston fuqarolarining yo‘lini kesib o‘tmoqchi bo‘lgani, oqibatda janjal yuzaga kelganini bildirgandi. Qirg‘iziston Ichki ishlar vazirligi xodimi ham hujumga uchragani aytilgan.