Myunxenda “Bavariya”ning taqdimot marosimi bo‘lib o‘tdi. Unda futbolchilar va murabbiylar shtabi umumiy suratga tushdi.
“Alyans Arena”ga yangi mavsumda tarkibda harakat qiladigan futbolchilar chiqdi. Ular orasida Sadio Mane ham bor edi.
Senegallik futbolchi stadionni tark etarkan, undan intervyu olmoqchi bo‘lgan jurnalistga qat’iy javob qaytardi: “Siz har kuni meni yo‘q qilasiz, yana siz bilan gaplashishimni xohlaysizmi?”.
Sadioning nemis jurnalistlari bilan munosabatlari yaxshi emas. Dastlab, OAV uning o‘yini pasaygani haqida yozgandi, keyin esa Manening Leroy Sane yuziga zarba bergani OAV nishoniga tushib qoldi.
Mane bir yil oldin Liverpuldan Myunxenga o‘tgan edi. Yaqin orada esa futbolchi faoliyatini Saudiya Arabistonida davom ettirishi mumkinligi haqida xabarlar bor. L’Equipe nashr xabariga ko‘ra, yarim himoyachi “An-Nassr”ga o‘tishga rozilik bergan. Futbolchining o‘zi “Bavariya”da qolmoqchi bo‘lgan, biroq rahbariyat unga ishonch bildirishni istamagan.
Ijtimoiy tarmoqlarda esa mersisaydliklar muxlislari Manening “Liverpul”ga qanday munosabatda bo‘lganini xotirlamoqda;
- “U “Bavariya”ga o‘tganida, ko‘pchilik Germaniyada Sadioga hurmat bilan munosabatda bo‘lishini yozgandi. Oqibatda nima bo‘ldi? U har kuni jurnalistlardan “zarba” qabul qilib oladi, jamoadoshlari uni hurmat qilmaydi, rahbariyat esa undan qutulmoqchi. Endi aytingchi, u “Liverpul”dan ketishi kerakmidi?
- “Hattoki, Angliya nashrlari Sadioga Germaniyadagidan ko‘ra hurmat bilan munosabatda bo‘lardi. Bu meni hayron qoldirgan, chuni Britaniya nashrlari, odatda, qattiqroq tanqid bilan yozadi”.
- “Menimcha, Sadioning “Liverpul”dan ketish qarori — faoliyatidagi eng yomon qaror bo‘lgan. Mane “Bavariya”da qolmasa kerak, chunki u klubga kerak emas. Endi u Saudiya Arabistoniga boradi va o‘sha yerda faoliyatini yakunlaydi. Bunday bo‘layotganidan afsusdaman”.
31 yoshli futbolchi 2022-yil yozida myunxenliklar tarkibiga qo‘shilgan va o‘tgan mavsum Bundesligada 25 ta o‘yin o‘tkazib, 7 ta gol hamda 5 ta golli uzatmaga mualliflik qilgan.
Izoh (0)