Shusha shahrida O‘zbekiston investitsiyalar, sanoat va savdo vaziri Laziz Qudratov va Ozarbayjon iqtisodiyot vaziri Mikail Jabborov raisligida ikki mamlakat o‘rtasida hamkorlik bo‘yicha Hukumatlararo qo‘shma komissiyaning 12-yig‘ilishi bo‘lib o‘tdi. Bu haqda “Dunyo” agentligi xabar berdi.
Investitsiyalar, sanoat va savdo vazirligi maʼlumotiga ko‘ra, muloqotda ikki davlatning asosiy vazirlik, idora, tarmoq birlashmalari, tijorat banklari va taʼlim muassasalari, shuningdek, diplomatik vakolatxonalari rahbarlari ishtirok etgan.
Yig‘ilishda shu kungacha erishilgan kelishuvlarni amalda tatbiq etishdagi muvaffaqiyatlar qayd etildi. Birgina 2022-yilda O‘zbekiston—Ozarbayjon o‘rtasidagi tovar ayirboshlash hajmi 1,5 barobar, 2023-yil boshidan buyon esa bu ko‘rsatkich 16 foizga oshdi. Jumladan, Ozarbayjonga to‘qimachilik mahsulotlari yetkazib berish hajmi 2,6 barobar, mexanik uskunalar yetkazib berish 19,7 foiz, shisha va shisha buyumlar yetkazib berish 76 foizga oshdi. Shu nuqtayi nazardan, yaqin yillarda o‘zaro tovar ayirboshlash hajmini 1 milliard dollarga yetkazish uchun ikki mamlakat iqtisodiyotlari yetarli salohiyatga ega ekani alohida taʼkidlangan.
Sanoat kooperatsiyasini rivojlantirish bo‘yicha birgalikda ish olib borishga alohida eʼtibor qaratilgan. Taʼkidlanishicha, so‘nggi besh yilda O‘zbekistonda Ozarbayjon kapitali ishtirokida tashkil etilgan qo‘shma korxonalar soni 4 barobar oshgan. Ikki yil ichida 40 ga yaqin korxona ishga tushgan. O‘z navbatida, Ozarbayjonda O‘zbekiston sarmoyasi ishtirokidagi 70 dan ortiq korxona muvaffaqiyatli faoliyat yuritmoqda.
Uchrashuvda energetika va transport sohalarida hamkorlikni kengaytirish, hududlararo, madaniy-gumanitar aloqalarni rivojlantirish masalalari ham ko‘rib chiqilgan.
Tadbir yakunlari bo‘yicha O‘zbekiston va Ozarbayjon o‘rtasidagi hamkorlik bo‘yicha hukumatlararo qo‘shma komissiyaning 12-yig‘ilishi bayonnomasi hamda HK doirasida erishilgan kelishuvlarni mustahkamlovchi boshqa bir qator hujjatlar imzolangan.
Izoh (0)