Ukrainaning Rossiya tomonidan anneksiya qilingan hududlaridan bolalar Belarusdagi sog‘lomlashtirish lagerlariga “ta’tilga” jo‘natilyapti, biroq ularning hammasi ham ortga qaytmayapti, ba’zilari Rossiya hududida g‘oyib bo‘lmoqda. Bu haqda muxolifatdagi Inqirozga qarshi xalq boshqaruvi rahbari va Belarusning o‘tish davri qo‘shma vazirlar mahkamasi vakili Pavel Latushko “Dojd” telekanaliga bergan intervyusida aytdi.
“Oxirgi ma’lumotlar Ukrainaning egallab olingan hududiga qaytmagan yetim bolalarga taalluqli. Ular g‘oyib bo‘lgan, ya’ni Rossiya hududida izsiz yo‘qolgan. Ularning hozir qayerda ekani haqida boshqa ma’lumot berolmaymiz”, — deydi Latushko.
U qancha ukrainalik bola shu tarzda g‘oyib bo‘lgan bo‘lishi mumkinligiga aniqlik kiritmadi.
Muxolifatchi siyosatchining aytishicha, huquq himoyachilari Belarusga olib ketilgan ukrainalik bolalarni yuzlaridan aniqlayapti. Bugungi kunga qadar ular 16 nafar yetim bolaning shaxsini aniqladi.
“Ammo bu faqat boshlanishi. Afsuski, ularning soni ikki yuzga yaqin bo‘lishi mumkin, deb ayta olamiz”, — dedi Latushko.
Anneksiya qilingan hududlarning Rossiya tomonidan tayinlangan “ma’muriyatlari” mehribonlik uylaridagi yetim bolalar reabilitatsiya uchun Belarusga olib ketilayotganini da’vo qilmoqda. Iyun oyida Rossiya va Belarus ittifoq davlati kotibi Dmitriy Mezensev qo‘shib olingan DXR va LXRdan 2 000 dan ortiq bolalar ota-onalari yoki vasiylarining roziligi bilan Minsk viloyatidagi sanatoriyga “dam olishga” ketganini aytdi.
18-iyul kuni Yevroparlament deputatlari Belarus rahbari Aleksandr Lukashenkoni hibsga olishga order berish talabi bilan Gaagadagi Xalqaro jinoiy sudga (XJS) murojaat qildi. Yevroparlamentning xalqaro ishlar bo‘yicha qo‘mitasi tomonidan qabul qilingan hujjatda Ukrainaga yetkazilgan zarar va uning hududida sodir etilgan jinoyatlar uchun Belarus ham javobgar ekani aytiladi. Bundan tashqari, Yevroparlament deputatlari ukrainalik bolalarni noqonuniy deportatsiya qilishda Lukashenkoning roliga ishora qilgan.
Eslatib o‘tamiz, mart oyida Xalqaro jinoiy sud Rossiya prezidenti Vladimir Putinni hibsga olishga order bergandi. U anneksiya qilingan hududlardan bolalarni Rossiyaga noqonuniy deportatsiya qilishda gumonlangan. Xuddi shunday order Rossiyaning bolalar huquqlari bo‘yicha vakolatli vakili Mariya Lvova-Belovaga nisbatan ham chiqarilgan.
Izoh (0)