Ukraina prezidenti Vladimir Zelenskiy Birlashgan Millatlar Tashkiloti bosh kotibi Antoniu Guterrishga qo‘ng‘iroq qilib, u bilan Rossiyaning don bitimidan chiqishi masalasini muhokama qildi. Bu haqda Ukraina prezidenti o‘zining Telegram-kanalida xabar berdi.
Zelenskiy yana bir bor Moskvaning harakatlarini tanqid qilib, kelishuvdan chiqishni “ocharchilikdan qurol sifatida foydalanish va jahon oziq-ovqat bozorini beqarorlashtirish” istagi bilan bog‘ladi. Unga ko‘ra, kelishuvning barbod bo‘lishi tufayli “Ukrainaning oziq-ovqat eksportiga qaram bo‘lgan Somali, Efiopiya, Janubiy Sudan va Yamanda 400 million kishi ochlikdan o‘lish xavfi ostida”.
“Qora dengiz don tashabbusi saqlanib qolishi kerak. Biz janob Guterrish bilan Qora dengizdagi yo‘llar orqali oziq-ovqat xavfsizligi va oziq-ovqat ta’minotini tiklash uchun mas’ul davlatlar bilan hamkorlikda ishlashga kelishib oldik”, — dedi Zelenskiy.
Bundan tashqari, u Guterrish va Turkiya prezidenti Rajab Toyyib Erdo‘g‘onga rasmiy maktublar jo‘natganini, ularga g‘alla bo‘yicha bitim ishlarini Rossiyaning ishtirokisiz davom ettirishni taklif qilganini aytdi.
17-iyul kuni Rossiya Qora dengiz portlaridan Ukraina oziq-ovqat mahsulotlarini eksport qilishga ruxsat beruvchi don bitimidan rasman chiqdi. U bu haqda Turkiya, Ukraina va BMT kotibiyatini xabardor qilgan. Rossiya yuk tashish xavfsizligi kafolatlarini ham bekor qildi va Qora dengiz shimoli-g‘arbiy qismidagi gumanitar koridorini cheklamoqchi.
Izoh (0)