Rossiya qiruvchi samolyotining uchuvchisi Suriya osmonida o‘z harakatlari bilan AQSH razvedkachi samolyotining to‘rt nafar ekipaji hayotini xavf ostiga qo‘ydi, deb xabar bermoqda Associated Press amerikalik rasmiylarga tayanib.
Nashr suhbatdoshlarining so‘zlariga ko‘ra, 16-iyul kuni Rossiyaning Su-35 qiruvchi samolyoti Amerikaning MS-12 razvedkachi samolyotiga “juda yaqin uchgan” va uni girdobsimon yo‘nalishda uchishga majbur qilgan. Rossiya qiruvchisi qanchalik yaqin uchganiga rasmiylar aniqlik kiritmadi.
O‘sha kuni Suriyadagi tomonlarni yarashtirish bo‘yicha Rossiya markazi rahbari o‘rinbosari Oleg Gurinov AQSH boshchiligidagi koalitsiya samolyotlari, jumladan, MS-12W uch marta Suriya havo hududini buzganini ma’lum qilgandi.
AP manbalarining aytishicha, rossiyalik uchuvchining siqib qo‘yishi Amerika ekipajining samolyotda xavfli uchishiga sabab bo‘lgan. Ular hodisani “xavfli xatti-harakatlarning yangi darajasi” deb atadi va “bu baxtsiz hodisa yoki odamlarning halok bo‘lishiga olib kelishi mumkin edi” deya qo‘shimcha qildi.
Associated Press agentligining ta’kidlashicha, Rossiya qiruvchi samolyotlari AQSHning MQ-9 Reapers dronlarini bir necha marta ta’qib qilgan bo‘lsa-da, so‘nggi voqea amerikaliklarning hayotini xavf ostiga qo‘ygani uchun xavotir uyg‘otdi.
Pentagonning yuqori martabali mulozimi nashrga aytishicha, Suriya osmonida Rossiya faolligining kuchayishiga qarshi turishning bir qancha variantlarini ko‘rib chiqmoqda. Qayd etilishicha, rossiyalik uchuvchilarning harakatlari iyul oyi boshida Amerika harbiylarining ISHID yetakchisiga zarba berishga urinishlarini murakkablashtirgan.
Associated Press manbasi bu ssenariylar haqida batafsil ma’lumot berishdan bosh tortdi, u faqatgina AQSH ISHIDga qarshi kurash missiyalarini bajarish uchun Suriya g‘arbiga uchishda davom etishini aytdi.
AP Rossiya harbiy faolligining oshishini Moskva, Tehron va Suriya hukumati o‘rtasida AQSHni Suriyadan chiqib ketishga majburlash maqsadida hamkorlik kuchaygani bilan izohladi.
Eslatib o‘tamiz, 5-iyul kuni Rossiyaning uchta qiruvchi samolyoti Suriya osmonida Amerika dronlariga xavfli darajada yaqin uchib, ularning yo‘nalishdan og‘ishiga sabab bo‘lgandi.
Izoh (0)