O‘zbekiston prezidentining Jahon savdo tashkiloti (JST) bo‘yicha maxsus vakili, bosh muzokarachi Azizbek O‘runov va qishloq xo‘jaligi vaziri o‘rinbosari Ahadbek Haydarov Jenevaga tashrif buyurdi, deb xabar beradi “Dunyo” agentligi.
Qayd etilishicha, tashrif tashkilotga aʼzo davlatlarni O‘zbekistonning JSTga aʼzo bo‘lish jarayonlarini faollashtirish bo‘yicha amalga oshirilayotgan ishlar natijalari bilan tanishtirish, shuningdek, Ozarbayjonning JSTga aʼzo bo‘lish bo‘yicha Ishchi guruhining 15-yig‘ilishida ishtirok etish maqsadida tashkil etilgan.
Tashrif doirasida O‘zbekiston delegatsiyasi JST bosh direktori Ngozi Okonjo-Iveala, uning o‘rinbosari Syanchen Chjan bilan uchrashgan. Shuningdek, Lotin Amerikasi, Osiyo-Tinch okeani mintaqasi, Yevropa va arab dunyosining ayrim mamlakatlari bilan tovar va xizmatlar bozoriga chiqish bo‘yicha qator ikki tomonlama muzokaralar o‘tkazilgan.
JST rahbariyati O‘zbekiston prezidentining yaqinda qabul qilingan mamlakatning tashkilotga aʼzo bo‘lish jarayonini faollashtirish to‘g‘risidagi qarorini yuqori baholagan. JST Kotibiyatining O‘zbekistonga aʼzo bo‘lish jarayonida har tomonlama ko‘mak ko‘rsatish va yuzaga kelayotgan muammolarni tezkorlik bilan hal etish uchun ikki tomonlama hamkorlikni faollashtirish majburiyati bildirilgan.
Ngozi Okonjo-Iveala, shuningdek, JST tashkilotiga aʼzo davlatlar bilan ikki tomonlama va ko‘p tomonlama muzokaralarni qo‘llab-quvvatlash maqsadida O‘zbekistonga texnik ko‘makni kengaytirishga tayyorligini ma’lum qilgan. Shu nuqtayi nazardan, tomonlar bir qator xalqaro maslahatchilardan ekspert yordamini jalb qilish imkoniyatlarini muhokama qilgan.
Tashrif davomida delegatsiya JST Kotibiyati bilan birgalikda O‘zbekistonning JSTga aʼzo bo‘lishi bo‘yicha ishchi guruhining 7-yig‘ilishini shartli ravishda 2023-yil sentabr—oktabr oylarida o‘tkazish uchun barcha fundamental hujjatlar to‘plamini tayyorlagan.
Iyun boshlarida O‘zbekistonda Jahon savdo tashkiloti masalalari bo‘yicha maxsus vakil lavozimi joriy etilgandi. JSTga aʼzo bo‘lish jarayonini jadallashtirish, masʼul vazirlik va idoralar faoliyatining natijadorligini taʼminlash bo‘yicha ishlarni muvofiqlashtirish maxsus vakilning asosiy vazifalaridan biri hisoblanadi.
Tashkilotga a’zo bo‘lish O‘zbekistonga nima beradi?
O‘zbekiston JSTga a’zo bo‘lishdan bir necha jihatdan foyda ko‘rishi mumkin:
Yangi bozorlarga chiqish: JSTga a’zo bo‘lish orqali O‘zbekiston butun dunyo bo‘ylab kengroq bozorlarga chiqish imkoniyatiga ega bo‘ladi. Bu eksport hajmini oshirish va mamlakatda xorijiy sarmoyalarni ko‘paytirishga yordam beradi. Natijada iqtisodiy o‘sish oshadi va ko‘proq ish o‘rinlari yaratiladi.
Yaxshilangan savdo qoidalari: O‘zbekiston JST a’zosi sifatida xalqaro savdo qoidalari va talablariga rioya qilishi talab qilinadi. Bu mamlakatda ishbilarmonlik muhitini yaxshilash, savdo amaliyotida shaffoflikni oshirish va korrupsiyani kamaytirishga yordam berishi mumkin.
Intellektual mulkni himoya qilish: JST intellektual mulk huquqlarini himoya qilish uchun asos yaratadi, bu O‘zbekistonning o‘sib borayotgan texnologiya va ijodkorlik sanoati uchun muhimdir.
Nizolarni hal qilish: JST xalqaro savdo bilan bog‘liq nizolarni hal qilish uchun platformani taqdim etadi. Tashkilotga qo‘shilish orqali O‘zbekiston boshqa davlatlar bilan nizolarni adolatli va xolis hal etishga yordam beruvchi mexanizmdan foydalanish imkoniyatiga ega bo‘ladi.
Umuman olganda, JSTga a’zo bo‘lish O‘zbekistonning jahon iqtisodiyotiga to‘liqroq integratsiyalashuviga, savdo amaliyotini yaxshilashga va iqtisodiy rivojlanishga yordam beradi. Bu bo‘yicha muzokaralar so‘nggi yillarda ancha oldinga siljidi.
Izoh (0)