Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasi “Do‘stlik” bog‘i yaqinida kesilgan daraxtlar bo‘yicha maʼlumot berdi.
Qayd etilishicha, ijtimoiy tarmoqlarda Toshkent shahridagi “Do‘stlik” (“Bobur”) bog‘ida daraxtlar kesilgani haqida eʼlon qilingan xabar boshqarma inspektorlari tomonidan o‘rganilgan.
O‘rganish davomida Yakkasaroy tumani Shota Rustaveli ko‘chasi 20-uyning qarama-qarshi tomonida noqonuniy ravishda 2 tup chinor — (diametri 62,1 va 61 sm bo‘lgan) daraxtlari tegishli ruxsatnomasiz Yakkasaroy tuman obodonlashtirish boshqarmasi xodimlari tomonidan tag qismidan kesib tashlagani aniqlangan.
Ushbu holat bilan “O‘simlik dunyosini muhofaza qilish va undan foydalanish to‘g‘risida”gi qonunning 37-moddasi talablari buzilgan bo‘lib, Vazirlar Mahkamasining 2022-yil 22-avgustdagi 464-sonli qaroriga asosan o‘simlik dunyosiga yetkazilgan zarar hisoblanganida 191,4 million so‘mni tashkil etgan.
Holat yuzasidan to‘plangan hujjatlar huquqiy baho berish uchun prokuratura organiga yuborilgan.
Noqonuniy daraxt kesish holatlari
Bir necha kun oldin Farg‘onadagi chegara posti yaqinida 12 tup manzarali daraxt qo‘porib tashlangani to‘g‘risida xabar berilgandi. O‘zbekistonda 2022-yil davomida daraxt va butalarning noqonuniy kesilishi ortidan tabiatga 10 milliard so‘m zarar yetkazilgan. O‘tgan yilda jami 1 777 tup qimmatbaho va ko‘p yillik daraxtlar kesilgan. Vaziyat tahlil etilganda, qurilish obyektlari atrofini o‘rab olish natijasida daraxtlarning qarovsiz qolishi, shikastlanishi va nobud bo‘lish holatlari sodir etilayotgani aniqlangan.
Izoh (0)