Toshkentning Amir Temur, Shahrisabz, Shota Rustaveli va Yangi Sergeli ko‘chalarida jamoat transporti koridorlari joriy etiladi. Bu haqda shahar hokimligi axborot xizmati xabar berdi. 

Unga ko‘ra, Normativ-huquqiy hujjatlar loyihalari muhokamasi portalida O‘zbekiston Respublikasi Vazirlar Mahkamasining “Toshkent shahrida yo‘lovchilar tashish faoliyati va ko‘rsatilayotgan transport xizmatlarini yanada takomillashtirish to‘g‘risida”gi qarori loyihasi muhokamaga qo‘yildi. 

Hujjat bilan Toshkent shahrining Amir Temur, Shahrisabz, Shota Rustaveli va Yangi Sergeli ko‘chalarida jamoat transporti koridorlarini joriy etish belgilanmoqda. Bunda, ushbu ko‘chalarda:

• avtobuslar uchun alohida yo‘laklar tashkil etiladi;
• chorrahalarda svetoforlarning muvofiqlashtirilgan boshqaruv tizimi joriy etilib, ularning geometrik parametrlarini o‘zgartirish orqali samaradorligi oshiriladi;
• yo‘nalishsiz taksi uchun yo‘lovchilarni tushirish/chiqarish maydonchalari joriy etiladi;
• ehtiyojdan kelib chiqib, yo‘l transport hodisalari tahlili asosida tartibga solingan piyodalar o‘tish yo‘laklari joriy qilinadi va svetoforlarni muvofiqlashtirilgan tizimga integratsiya qilish, xavfsizlik orolchalarini joriy etish ishlari olib boriladi;
• jamoat transporti infratuzilmasi obyektlari talab va ehtiyojdan kelib chiqqan holda rekonstruksiya qilinadi.