Toshkent shahar Sergeli tumani hududidan oqib o‘tuvchi Salor kanalida suv oqimining meʼyoridan oshiq oqishi sababli suv toshishi hodisasi kuzatildi. Bu haqda FVV matbuot xizmati xabar berdi.

Qayd etilishicha, tumanning “Junariq” MFY Junariq ko‘chasi hududidan oqib o‘tuvchi Salor kanalida suv oqimining meʼyoridan oshiq oqishi sababli suvning o‘zandan toshish hodisasi kuzatilgan. Natijada dastlabki maʼlumotlarga ko‘ra, “Junariq” ko‘chasida joylashgan 7 ta uy yerto‘lasi, hovlisi va 3 ta ishlab chiqarish sexi hududiga suv to‘plangan.

“Zudlik bilan voqea joyiga FVV rahbariyati va Toshkent shahar FVB rahbari boshchiligida qutqaruvchilar yetib borgan. Aholi xonadonlariga suv toshish holati to‘liq to‘xtagan. Maxsus texnikalar va suv tortish moslamasi (motopompa)lar yordamida qoldiq suvlarni tortish ishlari amalga oshirilmoqda”, — deyiladi xabarda.

Hodisa oqibatida tan jarohati olgan va halok bo‘lganlar yo‘q, uylarning devorlariga zarar yetmagan.

Toshkent shahar hokimligining maʼlum qilishicha, mahalladagi 9 ta xonadon va 3 ta ishlab chiqarish korxonasi hududiga suv toshishi kuzatilgan. Holatni bartaraf etishga FVBdan 9 ta maxsus texnika, 7 ta suv tortish moslamasi, “Toshkent shahar suv taʼminoti” korxonasidan 2 ta vodovoz hamda Kanallardan foydalanish va ularga tutash hududlarni obodonlashtirish boshqarmasidan 2 ta vodovoz jalb etilgan.

Aniqlanishicha, holat Toshkent viloyati Bo‘zsuv irrigatsiya tizimlari boshqarmasi tomonidan Toshkent shahar Kanallardan foydalanish va ularga tutash hududlarni obodonlashtirish hamda Favqulodda vaziyatlar boshqarmalarini ham ogohlantirmasdan Sergeli tumani, “Junariq” MFYdan oqib o‘tuvchi Jun kanalining hamda Chilonzor tumani, Seul ko‘chasidagi Bo‘rijar kanalining suv olish inshootlari nomaʼlum sabablarga ko‘ra yopilgani hamda Salor kanaliga to‘liq suv ochilgani oqibatida yuzaga kelgan.