Olmaotada politsiyachi o‘z hamkasbining boshidan otib qo‘ydi. Fojia Olmalin tumanidagi politsiya boshqarmasi binosida sodir bo‘ldi, deb xabar bermoqda “Daryo”ning Qozog‘istondagi muxbiri.
Politsiya voqea tafsilotlarini ma’lum qilar ekan, soqchilar o‘rtasida hech qanday mojaro bo‘lmaganini aytdi.
“Hodisa joyiga yetib kelgan prokurorlar voqea ertalab soat 7:50 da oziq-ovqat qabul qilish xonasida sodir bo‘lganini aniqladi. Gvardiya serjanti Daulet Amanbolovich Kaysanov (1995-yilda tug‘ilgan) qo‘riqchi Amangeldin Erdos Aydosulining boshiga (1995-yilda tug‘ilgan) xizmat to‘pponchasi bilan tasodifan o‘q uzdi”, — deb ma’lum qildi Olmaota politsiya departamenti matbuot xizmati.
Voqea sodir etgan shaxsga nisbatan Qozog‘iston Jinoyat kodeksining 104-moddasi bo‘yicha jinoiy ish qo‘zg‘atilgan. Ehtiyotsizlikdan odam o‘ldirgani uchun unga 4 yilgacha qamoq jazosi berilishi mumkin.
Talgat Satibaldi, Ostona
Izoh (0)