“Ekologiya, atrof-muhitni muhofaza qilish va iqlim o‘zgarishi vazirligi faoliyatini samarali tashkil etish chora-tadbirlari to‘g‘risida”gi prezident qaroriga muvofiq O‘zbekistonda “Oqilona isteʼmol” dasturi ishlab chiqiladi.
Qarorda belgilanishicha, 2023-yil iyulga qadar umumiy ovqatlanish sohasida oziq-ovqat chiqindilari hosil bo‘lishini kamaytirish va ortiqcha isrofgarchiliklarning oldini olish hamda BMT Oziq-ovqat va qishloq xo‘jaligi tashkiloti tavsiyalarini joriy etish maqsadida quyidagilarni nazarda tutuvchi “Oqilona iste’mol” dasturi ishlab chiqilib, Vazirlar Mahkamasiga kiritiladi:
- davlat organlari tomonidan tashkil etiladigan tadbirlarda oziq-ovqat isteʼmolining oqilona meʼyorini belgilash, ortiqcha isteʼmolni kamaytirish, shu jumladan bir shaxsga bir martalik ovqatlanish meʼyorini belgilash;
- umumiy ovqatlanish sohasidagi tadbirkorlar va isteʼmolchilarning oziq-ovqat mahsulotlariga nisbatan masʼuliyatini oshirish;
- aholi o‘rtasida to‘g‘ri ovqatlanish odatlarini shakllantirish va ortiqcha isrofgarchilikning oldini olish hamda meʼyoridan ortiq isteʼmolni targ‘ib qilishni cheklash;
- isrofgarchilikka yo‘l qo‘ygan shaxslarga moliyaviy choralar qo‘llash va nazorat mexanizmlarini o‘rnatish.
Shuningdek, mazkur qarorga ko‘ra, O‘zbekistonda ichimlik suvidan foydalanish bo‘yicha ko‘p qavatli uylar o‘rtasida “Tejamkor uy” va “Tejamkor xonadon” reyting tizimi ishga tushiriladi. Yil yakuniga ko‘ra, eng kam suv ishlatgan 20 ta xonadon hamda xonadonlarining 50 foizidan ortig‘i belgilangan meʼyorlardan kam suv ishlatgan 20 ta ko‘p qavatli uylar rag‘batlantiriladi. G‘olib xonadon va uylarga quyosh panellari yoki uy atrofini yoritish moslamalari bepul o‘rnatib beriladi.
Izoh (0)