Yevropa Ittifoqi Afg‘onistondagi “Tolibon” hukmronligini tan olmaydi, dedi Yevropa kengashi prezidenti Sharl Mishel 2-iyun kuni Cho‘lponotada Markaziy Osiyo davlatlari rahbarlari bilan uchrashuvda.
U Markaziy Osiyo va Yevropa Ittifoqi davlatlari terrorizmga qarshi kurash olib borishi zarurligini qayd etdi.
Afg‘onistondagi vaziyat haqida gapirar ekan, Mishel bu masalada ustuvor vazifalarni belgilashda Markaziy Osiyo davlatlari yordam berganini aytdi. U Yevropa Ittifoqi Afg‘onistonga gumanitar yordam ko‘rsatishini ta’kidladi.
“Bilasiz, Yevropa Ittifoqi “Tolibon” hukumatini tan olmaydi, chunki biz ayollar huquqlarini himoya qilish tarafdorimiz. Biz Afg‘oniston o‘z xalqaro majburiyatlarini bajarishi uchun hamma narsani qilamiz”, — dedi u.
Mishel, shuningdek, Markaziy Osiyo davlatlari bilan hamkorlikda ilgari surilishi kerak bo‘lgan bir qancha yo‘nalishlarni aniqlab olmoqchiligini aytdi.
“Biz siz bilan chegaralarni mustahkamlash mexanizmini kuchaytirish bo‘yicha hamkorlik qilishga tayyormiz”, — deya qo‘shimcha qildi u.
Bugun, 2-iyun kuni Qirg‘izistonning Cho‘lponota shahrida “Markaziy Osiyo – Yevropa Ittifoqi” ikkinchi mintaqaviy uchrashuv bo’lib o‘tmoqda. Tadbir kun tartibidan Markaziy Osiyo mamlakatlarining Yevroittifoq bilan konstruktiv muloqotini yanada rivojlantirish va amaliy hamkorligini kengaytirish masalalari o‘rin olgan. Uchrashuv doirasida O‘zbekiston prezidenti Shavkat Mirziyoyev Sharl Mishel bilan muzokara o‘tkazdi.
Bunday formatdagi birinchi mintaqaviy uchrashuv 2022-yil 27-oktabr kuni Ostona shahrida bo‘lib o‘tgan edi.
Izoh (0)