Shveysariya parlamenti — Milliy kengash uchinchi davlatlarga Shveysariyada ishlab chiqarilgan qurollarni Ukrainaga topshirishga ruxsat berish haqidagi “Lex Ukraine” nomli qonun loyihasini rad etdi. Parlament rasmiy saytining xabar berishicha, 98 nafar deputat hujjatga qarshi ovoz bergan bo‘lsa, 75 nafari uni yoqlab chiqqan.
Avvalroq Bern hukumati (Federal Kengash) Germaniya, Ispaniya va Daniyaning Ukrainaga qurol berish so‘rovlarini rad etgan va mamlakatning urush materiallari to‘g‘risidagi qonuniga asoslanib, urush zonalariga qurol yetkazib berishni taqiqlagan edi.
Shveysariya Federal Kengashi mamlakatda ishlab chiqarilgan qurollarni faqat alohida hollarda, masalan, Birlashgan Millatlar Tashkiloti Xavfsizlik Kengashi Rossiyaning Ukrainaga qarshi urushini qoralagan taqdirdagina reeksportga ruxsat berishi mumkin. Biroq bu variant istisno qilingan, chunki Rossiya Federatsiyasi BMT Xavfsizlik Kengashidagi qarorlarga veto qo‘yish huquqiga ega.
Shu bilan birga Yevropa Ittifoqi mamlakatlari Berndan qurol-yarog‘ reeksport qilishga qo‘yilgan taqiqning yumshatilishini istamoqda. Shveysariya parlamentariylarining bu boradagi fikrlari ikkiga bo‘lingan. Mamlakatning o‘ng markazchi Erkin demokratik partiyasi yetakchisi Tyerri Burkart Kiyevga qurol yetkazib berishdan bosh tortish Moskvani qo‘llab-quvvatlashni anglatishini aytgan. “Bizdagi veto huquqi boshqalarning Ukrainaga yordam berishiga to‘sqinlik qilmasligi kerak”, — degandi u.
Qishda o‘tkazilgan so‘rovnomada mamlakatdagi respondentlarning yarmidan ko‘pi (55 foizi) Ukrainaga qurol-yarog‘ reeksport qilinishiga ruxsat berish tarafdori ekanini bildirgan. O‘z navbatida Shveysariya Xalq partiyasi deputati Devid Suberbyuler qurolli to‘qnashuvda ishtirok etayotgan davlatga qurol jo‘natishiga ruxsat berish Shveysariyadagi “tinchlik va farovonlik poydevorini yo‘q qilishini” aytgan.
Izoh (0)