AQSH prezidenti Jo Bayden 1-iyun kuni Koloradodagi Harbiy-havo kuchlari akademiyasida diplom topshirish marosimi vaqtida sahnada yiqilib tushdi, deb xabar bermoqda Associated Press.
Bayden Kolorado-Springs shahrida bitiruvchilarni tabriklab, o‘z o‘rindig‘iga qaytayotgan vaqtda sahnada qoqilib ketdi va yiqildi. Unga havo kuchlari zobiti va AQSH maxfiy xizmatining ikki xodimi yordam berdi.
Tomoshabinlar, jumladan, sahnadagi rasmiy delegatsiyaning ba’zi a’zolari AQSH tarixidagi eng keksa prezident, 80 yoshli Baydenning harakatlarini tashvishlanib kuzatgan.
“Qumli qopga qoqilib ketdim”, — deb jurnalistlarga holatni kulib tushuntirdi prezident Oq uyga qaytayotganda. Sahnada Bayden va boshqa ma’ruzachilar ishlatadigan telesuflyor uchun ikkita kichik qumli qoplar yotqizilgandi.
AQSH sobiq prezidenti Donald Tramp Baydenning yiqilishiga munosabat bildirdi.
“Harbiy-havo kuchlari akademiyasining bitiruvidami? Nima, u yiqildimi? O‘ziga zarar yetkazmagan, deb umid qilaman. Lekin bunisi oshib tushdi. U biroz ehtiyotkor bo‘lishi kerak, shundaymasmi?”, — dedi u.
Izoh (0)