Armaniston Ukrainaga qarshi urushda Rossiyaning ittifoqchisi emas, dedi Armaniston bosh vaziri Nikol Pashinyan CNN Prima News telekanaliga bergan intervyusida. Suhbat Armaniston hukumatining YouTube’dagi kanalida chop etilgan.

“Siz Rossiya bilan ittifoqchimiz, dedingiz. Albatta, baralla aytilmadi, lekin menimcha, bu sezilib turibdi. Ukraina bilan urushda biz Rossiyaning ittifoqchisi emasmiz. Bu urush, bu mojarodan faqat tashvishdamiz, chunki bu barcha munosabatlarimizga bevosita ta’sir qiladi”, — dedi Pashinyan.

Uning taʼkidlashicha, G‘arb Armaniston Rossiyaning ittifoqchisi, degan gapga eʼtibor qaratmoqda. Moskva esa Yerevan Ukrainadagi “harbiy amaliyotlar”ni qo‘llab-quvvatlamayotganini ko‘rib turibdi. “Bundan kelib chiqadiki, biz bu vaziyatda hech kimning ittifoqchisi emasmiz”, — dedi Pashinyan.

May oyi o‘rtalarida Armaniston bosh vaziri Chexiyaning Respekt nashriga bergan intervyusida G‘arbning Rossiyaga qarshi sanksiyalari Armaniston uchun “qizil chiziq” ekanini aytgandi. “Biz ruslarga aniq qilib aytamiz: sizni xafa qilishni xohlamaymiz, lekin o‘zimizni sanksiyalarga duchor qilolmaymiz. Bu yerda hech qanday sir yo‘q”, — deya Pashinyanning so‘zlarini keltirgan Armenpress.

May oyi oxirida Armaniston bosh vaziri mamlakat Kollektiv Xavfsizlik Shartnomasi Tashkilotining Qirg‘izistondagi qo‘shma mashg‘ulotlarida ishtirok etish to‘g‘risida hali qaror qabul qilmaganini, chunki Yerevanda tashkilot “Armanistondan yuz o‘girayotgani” haqida taassurot paydo bo‘lganini aytdi. Uning qayd etishicha, KXSHT mamlakatga monitoring missiyasini yuborish haqidagi so‘rovlarga javob bermayapti. “Men Armaniston KXSHT aʼzoligini to‘xtatib turish yoki muzlatish to‘g‘risida qaror qabul qilishi mumkinligini istisno etmayman”, — deya ogohlantirdi Pashinyan.