AQSH yangi harbiy yordam paketi doirasida Ukrainaga Patriot zenit-raketa komplekslari va HIMARS yoppasiga o‘t ochuvchi reaktiv tizimlari uchun o‘q dorilar, shuningdek, yangi havo mudofaa tizimlarini beradi. Bu haqda Oq uyda bo‘lib o‘tgan brifingda Milliy xavfsizlik kengashining strategik aloqalar bo‘yicha koordinatori Jon Kirbi ma’lum qildi.
Kirbining aytishicha, Ukraina Qurolli kuchlari Patriot komplekslaridan “ancha samarali” foydalanmoqda. Patriot va HIMARS uchun o‘q-dorilardan tashqari, yordam paketi tarkibidan yangi Avenger va Stinger havo mudofaa tizimlari, artilleriya snaryadlari va tankka qarshi qurollar uchun o‘q-dorilar joy oladi. Kirbi Kiyevga beriladigan qurollar soni haqida batafsil aytmadi.
Gap Ukrainaga 39-yordam paketi haqida ketmoqda, buning uchun qurollar AQSH Mudofaa vazirligi zaxiralaridan olinadi.
25-may kuni Reuters AQSH maʼmuriyatining Ukrainaga 300 million dollarlik harbiy yordam paketini taqdim etish rejalari haqida xabar berdi. 31-may kuni Pentagon bu miqdorni tasdiqladi. “Jami hisobda Qo‘shma Shtatlar Jo Baydenning prezidentlik muddati boshlanganidan beri Ukrainaga 38,3 milliard dollardan ortiq harbiy yordam yubordi”, — deyiladi AQSH mudofaa vazirligi bayonotida. Shundan 37,6 milliard dollar 2022-yil 24-fevralda Rossiyaning Ukrainaga bosqini boshlanganidan keyin ajratilgan, deya aniqlik kiritdi vazirlik.
Izoh (0)