Maktabga borish uchun Sirdaryoni qayiqda suzib o‘tadigan qiz 2022-yil oxirilarida ko‘plab muhokamalarga sabab bo‘lgandi. Endilikda u yangi o‘quv yilidan boshlab Guliston Olimpiya va paralimpiya sport turlariga tayyorlash markazida akademik eshkak eshish yo‘nalishida o‘qishni davom ettiradigan bo‘ldi.

Ijtimoiy tarmoqlarda asli bekobodlik bo‘lgan qizaloq — Zamira To‘ychiyeva haqida xabar tarqalgach, viloyat hokimi vazifasini bajaruvchi Akmaljon Mahmudaliyev u o‘qiyotgan maktabga borib, unga noutbuk va kitoblar sovg‘a qilgan, onasi bilan suhbati chog‘ida qizining puxta bilim olishi uchun barcha yordamni ko‘rsatishini aytgandi.

Hokimlik matbuot xizmatining ma’lum qilishicha, endi qiz daryo kechib maktabga bormaydi. Viloyat hokimi taklifiga ko‘ra, Zamira To‘ychiyeva yangi o‘quv yilidan boshlab Guliston Olimpiya va paralimpiya sport turlariga tayyorlash markazida akademik eshkak eshish yo‘nalishida o‘qishni davom ettiradigan bo‘ldi.

Markazda yotoqxona va 4 mahal bepul ovqat bilan ta’minlanadi. Shuningdek, bo‘sh vaqtlarida unga “Yoshlar markazi”da dasturlash hamda IT-sohasini o‘rganishi uchun sharoit yaratib beriladi.