“Adolat” partiyasi O‘zbekiston prezidentligiga nomzodini tasdiqladi

“Adolat” sotsial-demokratik partiyasi 29-may kuni O‘zbekiston prezidentligiga nomzodini tasdiqladi.

Unga ko‘ra, 29-may kuni “Adolat” sotsial-demokratik partiyasining navbatdan tashqari qurultoyi o‘tkazildi. Unda partiyaning XI plenumi qaroriga asosan delegat sifatida belgilangan partiya siyosiy kengashi aʼzolari, Oliy Majlis Qonunchilik palatasidagi partiya fraksiyasi aʼzolari, Markaziy nazorat-taftish komissiyasi aʼzolari, hududiy partiya tashkilotlari konferensiyalarida saylangan delegatlar, shuningdek, taklif etilgan xalq deputatlari mahalliy kengashlari deputatlari, partiya faollari, hamkor tashkilotlar va ommaviy axborot vositalari vakillari ishtirok etdi.

Qurultoyda prezidentlikka O‘zbekiston “Adolat” sotsial-demokratik partiyasidan nomzod ko‘rsatish to‘g‘risidagi masala atroflicha muhokama qilindi. Delegatlar prezidentlikka Robaxon Maxmudovaning nomzodini qo‘llab-quvvvatladi. Nomzod saylovoldi dasturida huquqiy demokratik, ijtimoiy davlat va adolatli fuqarolik jamiyati qurishning sotsial-demokratik modelini taklif etdi.

Dastur o‘nta yo‘nalishdan iborat bo‘lib, huquqiy davlat qurish, ijtimoiy adolatni qaror toptirish, milliy iqtisodiyotning barqaror o‘sishini taʼminlash, ilm-fan, innovatsiyalar va taʼlim sohasining barqaror rivojini kafolatlash, aholi salomatligini kuchaytirish, jamiyat barqaror rivojlanishini taʼminlash, ekologiya va atrof-muhitga eʼtiborni kuchaytirish, fuqarolik jamiyati, ayol va oilaning jamiyatdagi o‘rnini kuchaytirish, yuksak maʼnaviyatli jamiyat barpo etish, tinchliksevar, adolatli va progressiv tashqi siyosat olib borish kabi vazifalar shular jumlasidan.

Shuningdek, nomzod dasturidan inson huquqlarini taʼminlash uchun yangi imkoniyatlar yaratish, qonunlarni to‘g‘ridan to‘g‘ri ishlaydigan mexanizmlar bilan qabul qilish kabi vazifalar o‘rin olgan. Nomzod saylovoldi dasturida fuqarolarni ijtimoiy himoya qilish va bu yo‘nalishda tadbirkorlik subyektlarini qo‘llab-quvvatlash bo‘yicha “Ijtimoiy davlat – 2030” dasturini ishlab chiqish, shuningdek, “Tibbiy yordamning kafolatlangan hajmi to‘g‘risida”gi qonun qabul qilish zarurati kabi takliflarni ilgari surdi.