Toshkentda xonadon balkoniga osilgan Ukraina bayrog‘i kran yordamida olib tashlandi
Toshkent shahar Mirzo Ulug‘bek tumanida joylashgan ko‘p qavatli uydagi xonadon balkoniga ilingan Ukraina bayrog‘i maxsus kran orqali olib tashlandi. Bu haqda BBC Uzbek nashri xabar berdi.
Unga ko‘ra, holat 24-may kuni soat 18:00 atrofida yuz bergan. Xonadon sohibi Rejep Latipov voqea yuz bergan payt uyda hech kim bo‘lmagani, o‘zi turmush o‘rtog‘i bilan Turkiyada ekanini bildirgan. Bayroq olib tashlanishidan uch soatcha avval o‘zini Mirzo Ulug‘bek tuman IIB xodimi deb tanishtirgan shaxsdan qo‘ng‘iroq bo‘lgan.
“Adashmasam, o‘zini jinoyat-qidiruv bo‘limidan Murod deb tanishtirdi. Shu uy menga tegishli ekanligi haqida so‘radi. Yana o‘zingiz yo rafiqangiz Ukraina fuqarosi emasmi, degan savol berdi. Men yo‘q, dedim. Keyin nega balkonimda Ukraina bayrog‘i turgani sababini surishtirdi”, — deydi xonadon egasi.
Uning ta’kidlashicha, Ukrainaning Chernovsi shahrida tug‘ilgan, ammo doimiy O‘zbekistonda yashab, ishlab keladi. U nafaqat Ukrainada tug‘ilgani, balki Rossiya ochgan urushga jiddiy qarshi bo‘lgani uchun ham Ukraina bayrog‘ini xonadonida saqlaganini aytgan.
