O‘zbekistonning 25 yoshgacha bo‘lgan fuqarolari uchun xorijga chiqish pasporti 5 yil muddatga berilmoqda. Bu haqda bloger Davletovuz o‘zining Twitter’dagi sahifasiga yozdi. Ilgari hujjat 16 yoshga to‘lmagan fuqarolarga 5 yil muddatga, 16 yoshdan oshgan fuqarolarga 10 yil muddatga berilar edi.
“Gazeta.uz”ning qayd etishicha, qonun hujjatlariga prezidentning 2022-yil 16-iyundagi qarori bilan o‘zgartirish kiritilgan. Rasmiy organlar va OAV pasport berish tartibini soddalashtirgan (xususan, uni ro‘yxatdan o‘tgan joyidan qatʼi nazar olishga ruxsat etilgan) ushbu hujjat haqida xabar bergan, ammo yoshni 16 yoshdan 25 yoshgacha oshirish bandi eʼtibordan chetda qolgan.
Pasport olish bo‘yicha aksariyat saytlar, jumladan, Yagona interaktiv davlat xizmatlari portalida hamon eski maʼlumotlar mavjud.
“Xorijga chiqish pasportini olish uchun murojaat qilgan ayrim o‘zbekistonliklarning bildirishicha, 22−23 yoshgacha bo‘lgan har ikki jinsdagi fuqarolar bilan terrorizmga qarshi kurash bo‘limi vakili va mahalladagi uchastka inspektori suhbat o‘tkazgan. Yoshlardan chetga chiqish maqsadi va xorijda qolish muddati, shuningdek, ota-onalarning sayohat haqida xabardorligi so‘raladi. Baʼzilar ro‘yxatdan o‘tish joyida yoshlar bilan ishlash tashkilotidan maʼlumotnoma so‘rashganini aytmoqda”, — deyiladi xabarda.
O‘zbekiston fuqarolari 2021-yil 1-yanvardan boshlab faqat yangi turdagi xorijga chiqish biometrik pasporti (“qizil pasport”) bilan O‘zbekiston hududidan chiqmoqda. Xorijga chiqish pasporti 2019-yilning 1-yanvaridan, ilgari amalda bo‘lib kelgan, ikki yil muddatga taqdim etilgan xorijga chiqishga ruxsat beruvchi stiker (OVIR) o‘rniga joriy etilgan. O‘shanda xorijga chiqish pasportlari 10 yil amal qilishi aytilgandi.
Izoh (0)