Demoscope jamoatchilik fikrini monitoring qiluvchi byuro qozog‘istonliklar o‘rtasida so‘rovnoma o‘tkazdi. Ma’lum bo‘lishicha, respublika aholisining aksariyati Qosim-Jo‘mart To‘qayevni yaxshi ko‘radi, deb xabar bermoqda “Daryo”ning Qozog‘istondagi muxbiri.
So‘rovnomaga ko‘ra, qozog‘istonliklar eng ko‘p Rossiya prezidenti – Vladimir Putinni yoqtirmaydi. U “yoqmaydi” yo‘nalishi bo‘yicha 32 foiz ovoz to‘plagan. Chorak foiz ovoz Vladimir Zelenskiy va Jo Baydenga berilgan. Si Szinpin uchun — 20 foiz. Eng kam qozog‘istonliklar yoqtirmaydigan prezident — Erdo‘g‘on bo‘lib chiqdi, u 5,5 foiz ovoz olgan. Qosim-Jo‘mart To‘qayevni yoqtirmaganlar ovozi 6,9 foizni tashkil etgan.
Rossiya va Ukraina o‘rtasidagi urushda qozog‘istonliklarning aksariyati Ukrainani qo‘llab-quvvatlamoqda – 21,1 foiz. Rossiyaliklarni 12 foiz respondent qo‘llagan bo‘lsa, 60 foiz ishtirokchilar neytral qolmoqda. Shuncha respondentlar (61 foiz) Rossiya hech qachon Qozog‘istonga hujum qilmaydi, deb hisoblasa, 23,3 foizi bunday bo‘lishi mumkinligini istisno qilmagan.
54 foiz qozog‘istonliklar urush murosa bilan yakunlanishiga ishonmoqda. Ularning kichik qismi u yoki bu tomon g‘alaba qozonadi degan fikrda. Shu bilan birga, sotsiologlar ta’kidlaganidek, eng rossiyaparast pozitsiyani Rossiya teledasturlaridan ma’lumot oladigan 60 yoshdan yuqori fuqarolar egallaydi. Yosh qozog‘istonliklar Rossiya va Putin siyosatini eng ko‘p tanqid qilmoqda.
Talgat Satibaldi, Ostona
Izoh (0)