Futbol bo‘yicha 20 yoshgacha bo‘lgan futbolchilar o‘rtasidagi Jahon Chempionati 20-may, shanba kuni start oladi.
Ochilish o‘yinida O‘zbekiston U-20 jamoasi musobaqa mezboni Argentinaga qarshi maydonga tushadi. Uchrashuv 20-may tunida, soat 02:00 da start oladi.
Musobaqa haqida
Dastlab, 20 yoshgacha bo‘lgan yoshlar o‘rtasidagi Jahon Chempionati Indoneziyada o‘tkazilishi kerak edi. Biroq Indoneziya aholisi musobaqada Isroilning ishtirok etishidan norozi bo‘ldi. O‘yinlarni qabul qiladigan ayrim shaharlar rahbarlari Isroilni o‘z hududiga kirgizmasligini aytgan. Shundan so‘ng FIFA mamlakatni musobaqa mezbonligidan mahrum qildi va turnir Argentinada o‘tkaziladigan bo‘ldi.
Janubiy Amerika mamlakati mezbonlik qilayotgan turnir tarixdagi 23-turnir bo‘ladi (ilk bor 1977-yilda o‘tkazilgan). Musobaqa har ikki yilda bir marta o‘tkaziladi.
20 yoshgacha bo‘lgan futbolchilar o‘rtasidagi mundialda eng ko‘p g‘oliblik aynan hozirgi mezbonlarga tegishli. Argentina yoshlari musobaqada 6 marta zafar quchgan.
Kichik Jahon Chempionatida 24 ta jamoa ishtirok etadi. Ular oltita guruhga bo‘lingan. O‘yinlar 2023-yilning 20-mayidan 12-iyuniga qadar bo‘lib o‘tadi.
O‘zbekiston terma jamoasi A guruhidan joy oldi va Argentina, Yangi Zelandiya, Gvatemala yoshlariga qarshi o‘yin o‘tkazadi. Quyida Ravshan Haydarov shogirdlarining guruhdagi taqvimi keltirilgan.
O‘zbekiston o‘z tarixida 5-marta U-20 Jahon Chempionatida ishtirok etmoqda
O‘zbekiston yoshlar terma jamoasi 2003-yilda ilk bor mundialda ishtirok etgan. B guruhida Argentina, Ispaniya va Maliga qarshi bahs olib borgan. Uchala o‘yinda ham mag‘lubiyatga uchragan yoshlar musobaqani guruh bosqichidayoq yakunlashga to‘g‘ri kelgan.
2009-yilda ham U-20 yoshlari guruh bosqichida o‘z ishtirokini yakunlagan. D guruhida Urugvay, Angliya va Gana kabi terma jamoalarga qarshi o‘ynagan o‘zbekistonlik yoshlar faqatgina Angliyaga qarshi bahsda durang natija qayd etgan. Qolgan ikkita o‘yinda raqibga mag‘lub bo‘lgan.
2013-yilda O‘zbekiston yoshlari o‘z tarixida uchinchi bor mundialda ishtirok etgan. F guruhida Yangi Zelandiya (3:0), Xorvatiya (1:1), Urugvay (0:4) kabi jamoalar bilan o‘ynab, 4 ochko jamg‘argan holda pley-offga yo‘l olgan. Nimchorak finalda Gretsiya 3:1 hisobida taslim etilgan. Chorak finalda esa Fransiya O‘zbekiston darvozasiga javobsiz 4 ta gol urgan.
2015-yil Yangi Zelandiyaga bo‘lib o‘tgan mundialda O‘zbekiston guruh bosqichida Germaniya (0:3), Gonduras (3:4), Fiji (3:0) mamlakatlari bilan bahs olib borib, 3-o‘rin bilan pley-off yo‘llanmasini hal qildi. Nimchorak finalda Avstriya ustidan 2:0 hisobida g‘alaba qozongan o‘zbekistonliklar chorak finalda Senegalga 0:1 hisobida imkoniyatni boy bergan.
Jamoalar musobaqaga qanday yetib keldi?
Ravshan Haydarov shogirdlari musobaqaga Toshkentda o‘tkazilgan Osiyo Kubogi g‘olibi sifatida tashrif buyurmoqda.
Argentina 2023-yilgi Janubiy Amerika U-20 chempionati doirasida mundial saralashidan o‘ta olmagan bo‘lsa ham, Indoneziya o'rniga mezbon mamlakat sifatida turnirga yo'llanmaga ega chiqdi.
Murabbiylarning uchrashuvdan avvalgi fikrlari
O‘zbekiston U-20 jamoasi bosh murabbiyi Ravshan Haydarov Argentinaga qarshi ochilish o‘yini oldidan raqibning nomi yuzasidan bosim yo‘qligini va shogirdlari oldiga qo‘yilgan maqsadlarni aytib o‘tdi.
Argentina bilan o‘tgan yili ham o‘ynaganmiz. Ularni so‘nggi o‘yinlarini tahlil qildik, kuchli va kuchsiz tomonlarini o‘rgandik va shunga yarasha tayyorgarlik olib bormoqdamiz. Kuchli raqib, nom yuzasidan hech qanday bosim yo‘q. Chunki biz nafaqat Argentina, balki Urugvay, Braziliya bilan ham o‘ynab, yetarlicha tajriba to‘pladik.
Avval ham Jahon Chempionatlarida ishtirok etganmiz. Shu sababli oldimizga oliy maqsadni qo‘yganmiz, qolaversa, avvalgi ishtiroklarimizdagi natijalarimizni yaxshilashni ham maqsad qilganmiz. Bolalarning ishtiyoqi baland, ularda o‘zlariga nisbatan ishonch bor. O‘ylaymanki, Jahon chempionatiga tayyormiz.
Argentina yoshlari murabbiyi Xavyer Maskerano esa O‘zbekiston U-20 jamoasi jiddiy raqib ekanini va bo‘lajak o‘yin qiyin bo‘lishini aytdi.
O‘zbekiston juda yaxshi jamoa. Ularni bilmaydiganlar haqida shuni aytishim mukinki, ular nima qilish kerakligini yaxshi biladi. O‘tgan yili 5-3-2 sxemasida harakat qilgan raqibimiz iqtidorli vingerlarga ega hamda to‘p nazoratini yaxshi ko‘radi. Ular yakkakurashlarda kuchli, bu haqda shogirdlarimni ogohlantirganman.
Uchrashuv oson bo‘lmaydi. Biz ularga qarshi o‘tgan yilning sentyabr oyida o‘ynaganmiz. Raqib jamoa tarkibida ba’zi nomlar o‘zgargan, ammo maqsad o‘sha-o‘sha: ular yaxshi o‘yin ko‘rsatishga va to‘pni nazorat qilishga harakat qiladi. Qiyin bo‘ladi.
Izoh (0)