Jinoyat ishlari bo‘yicha Toshkent shahar Chilonzor tuman sudida 12-may kuni metroda qiz bolaga shahvoniy shilqimlik qilgan yigit ishi ko‘rib chiqildi. Bu haqda “Nemolchi.uz” loyihasi xabar berdi.
Maʼlum bo‘lishicha, 10-may kuni 24 yoshli xorazmlik J.Sh. metro vagoni ichida o‘zi tanimagan voyaga yetmagan qizning tanasiga teginib, shilqimlik qilgan. Qiz bu haqda darhol vokzal xodimlariga xabar bergan, huquqbuzar qo‘lga olingan.
Fuqaro J.Sh. o‘z aybiga iqror bo‘lib, qilmishidan pushaymon ekanini aytgan va suddan jazoni yengillashtirishni so‘ragan. Jabrlanuvchi, o‘z navbatida, unga tegishli jazo berilishini talab qilgan.
Dastlabki tergov organlari yigitning ishini Maʼmuriy javobgarlik to‘g‘risidagi kodeksning 183-moddasi (mayda bezorilik) sifatida kvalifikatsiya qilgan. Biroq raislik qiluvchi sudya uni 41−1-modda (shahvoniy shilqimlik qilish) bilan aybdor deb topgan. Bunda uning muqaddam ham maʼmuriy javobgarlikka tortilgani, uning harakatlarida javobgarlikni yengillashtiruvchi holatlar mavjud emasligi inobatga olingan.
Sud hukmi bilan ayblanuvchi besh sutkaga ozodlikdan mahrum etilgan. Shuningdek, shaxsdan oziq-ovqat pullari sifatida davlat daromadiga 225 ming so‘m undirirish belgilangan.
“Sudya Qurbonovning eʼtiborliligi quvontiradi, u ishning noto‘g‘ri kvalifikatsiya qilinganiga eʼtibor qaratdi va uni yaqinda qabul qilingan ‘Shahvoniy shilqimlik qilish’ moddasiga qayta tasnifladi. Bu huquqbuzarlikning alohida turi va odamlar buni qonun bilan jazolanishini bilishlari kerak", — deya yozadi “Nemolchi.uz” loyihasi.
Bir necha kun oldin Toshkent viloyati Yangiyo‘l tumanida yashovchi 19 yoshli yigit 10 kun davomida voyaga yetmagan qizni bo‘sh uyda saqlab, uni o‘zi bilan jinsiy aloqa qilishga majburlab kelgani ma’lum bo‘lgandi. Aprel boshida esa Xorazmdagi oilaviy bolalar uyi rahbari uch nafar voyaga yetmagan tarbiyalanuvchini 10 oy davomida viloyat adliya boshqarmasi va tuman favqulodda vaziyatlar bo‘limi boshliqlari bilan jinsiy aloqada bo‘lishga majburlagani ma’lum bo‘lgandi. Adliya vazirligi Jamoatchilik bilan aloqalar bo‘limi ushbu xodim lavozimidan ozod etilganini bildirgan.
Izoh (0)