Rossiya 2023/2024-o‘quv yilida Markaziy Osiyo mamlakatlari talabalari uchun kvotalar sonini oshiradi. Bu haqda Rossiya tashqi ishlar vaziri o‘rinbosari Mixail Galuzinga tayanib, “Interfaks” xabar berdi.
Mixail Galuzin Tomsk universitetida bo‘lib o‘tayotgan “Valday” xalqaro munozara klubining uchinchi Markaziy Osiyo konferensiyasida bu haqda ma’lumot berdi.
“2023/2024-o‘quv yilida biz Qozog‘iston fuqarolarini o‘qitish uchun kvotani sezilarli darajada oshirmoqdamiz, qo‘shimcha 200 o‘rin, Qirg‘iziston uchun 200, O‘zbekiston uchun 50 va Tojikiston uchun 152 o‘rin”, — dedi Galuzin.
Unga ko‘ra, hozirda Rossiyada Markaziy Osiyo davlatlaridan 185 mingga yaqin talaba tahsil olmoqda, shundan 68 mingga yaqin talaba Rossiya budjeti hisobidan o‘qiydi.
Bundan tashqari, Galuzin yaqin kelajakda bir qator Markaziy Osiyo davlatlarida Rossiyaning yetakchi universitetlarining filiallarini ochish rejalashtirilayotganini aytdi.
“Qirg‘izistonda Rossiyaning yetakchi oliy o‘quv yurtlari: Lomonosov nomidagi Moskva davlat universiteti, Qozon federal universiteti va Oliy iqtisodiyot maktabi filiallarini, O‘zbekistonda Rossiya gumanitar universiteti, Moskva davlat geodeziya va kartografiya universiteti va Shimoliy Kavkaz federal universitetini ochish rejalashtirilgan”, — dedi vazir o‘rinbosari.
U Ashxobodda Rossiya—Turkmaniston qo‘shma universitetini tashkil etish loyihasi kelishuv bosqichida ekanini qo‘shimcha qildi.
“Bularning barchasi Markaziy Osiyoda faoliyat yuritayotgan universitetlarimizning 25 ta filialiga qo‘shimcha bo‘ladi”, — deya xulosa qildi u.
Izoh (0)