Toshkent shahri aholisi yiliga 100 ming nafarga ko‘paymoqda. Bu haqda shahar hokimi Shavkat Umrzoqov “Daryo” muxbiriga bergan intervyusida maʼlum qildi.
Shavkat Umrzoqov poytaxtga soni o‘sib borayotgan aholini qanday sig‘dirish mumkinligi to‘g‘risidagi savolga javob qaytardi. Hokimning aytishicha, “Yangi Toshkent” loyihasi mazkur masalaga yechimdir.
“Toshkent shahri aholisi yiliga 100 mingtaga oshyapti. Buni ichki migratsiya ham o‘z ichiga oladi. Prezident bu yil poytaxtda 18 mingta xonadon qurishimizni aytdilar. Yangi uylarda 100 ming odam yashaydi. Albatta, kelajakdagi o‘sishni hisobga olyapmiz. Oldin bunday tug‘ilish, ‘propka’lar bo‘lmagan. Shahar ham kengaymoqda. O‘zida bir million kishini sig‘dira oladigan yangi shahar quramiz. Bunga zarur bo‘lgan barcha infrasutruktura yaratiladi. Shaharga har yili 100 ming odam kelsa, 10 yilda ularning soni 1 million nafarga yetadi. Hammasiga sabr va shukronalik bilan erishamiz”, — dedi hokim.
Maʼlumotlarga ko‘ra, bugungi kunda Toshkent hududi 43 ming gektar, aholi soni 3 millionga yaqinlashgan. Prognozlarga qaraganda, 2041-yilga borib poytaxt aholisi 5 million kishiga yetadi.
2022-yil oktabrda prezident Shavkat Mirziyoyev Toshkent shahrining 2045-yilgacha bo‘lgan Bosh rejasi loyihasi bilan tanishgandi. Loyihaga ko‘ra, kelgusi 22 yil ichida “Yangi Toshkent” barpo etiladi. Yaʼni poytaxtning sharqiy qismida, Chirchiq va Qorasuv daryolari oralig‘ida yangi shahar quriladi. U 20 ming gektar maydonni egallaydi.
Mazkur loyiha ustida “ToshkentboshplanLITI” korxonasi chet ellik va mahalliy loyihachilar ikki yil davomida ishlagan. Jarayon javomida aholining o‘sishi, transport va muhandislik tarmoqlari, iqlim o‘zgarishlari tahlil qilinib, shu asosida transport tugunlari va aholi punktlarini rivojlantirish strategiyasi ishlab chiqilgan.
Trasport vaziri Ilhom Mahkamov “Daryo” muxbiriga bergan intervyusida “Yangi Toshkent”da tramvay liniyasi ham qurilishini aytdi.
“Mutaxassislar Toshkent shahri ichiga tramvay kiritilsa, biz kattaroq tirbandlikka duch kelishimizni aytmoqda. Tramvay yurgandan keyin emas, qurilish jarayonida. Bu ko‘p vaqt va mablag‘ talab qiladi. Shuning uchun yaqin orada prezidentimiz huzurida ‘Yangi Toshkent’ bilan ‘Eski Toshkent’ni bog‘laydigan tramvay loyihasi taqdimotini o‘tkazamiz”, — dedi vazir.
Izoh (0)