Yulduz Usmonovadan Alisher Fayzgacha — Qo‘qonda mashhurlar ishtirokida o‘tkazilgan “Konstitutsiya o‘zimizniki” targ‘ibot tadbiridan fotoreportaj

Qo‘qon shahrida yoshlar tashabbusi bilan “Konstitutsiya meniki, seniki, bizniki! Konstitutsiya o‘zimizniki” shiori ostida Konstitutsiyaviy qonun loyihasi bo‘yicha targ‘ibot tadbiri va konsert-shou dasturi bo‘lib o‘tdi. Bu haqda “Daryo” muxbiri Azizjon Ermatov xabar berdi.

Qo‘qon musiqali drama teatri ochiq maydonida o‘tkazilgan tadbirda shahardagi oliy ta’lim muassasalari talabalari hamda mahallalarda yashovchi minglab yoshlar ishtirok etdi.

O‘zbekiston xalq artisti Yulduz Usmonova, O‘zbekiston xalq shoiri Iqbol Mirzo, Qo‘qon davlat pedagogika instituti professori Zebo Qobilova, O‘zbekiston davlat san’at va madaniyat instituti Farg‘ona mintaqaviy filiali direktori Shamsiddin Usmonov o‘z chiqishlarida Konstitutsiyaga kiritilayotgan o‘zgarishlar, ularning afzalliklari haqida gapirdi.

Tadbir davomida yangilanayotgan Konstitutsiya to‘g‘risida, shuningdek, referendum o‘tkazish tartibi, unda ishtirok etish bo‘yicha yoshlar tashabbuslari, takliflari ilgari surildi.

Konsert dasturi tarzida o‘tkazilgan targ‘ibot tadbirida san’atkorlar, mamlakatning taniqli shaxslari so‘z olib, Qo‘qon ahlini konstitutsiya islohotlarida faol bo‘lishga va 30-aprelga belgilangan referendumda ishtirok etishga chaqirdi.

Konstitutsiyaviy qonun loyihasi bo‘yicha targ‘ibot tadbirlari respublikaning barcha hududlarida o‘tkazilishi rejalashtirilgan.