Maurisio Pochettino “Real”da Karlo Anchelottining o‘rnini egallashi mumkin. Florentino Peres argentinalik mutaxassisga ishonch bildirmoqchi

“Real” prezidenti Florentino Peres jamoaning yangi murabbiyi Maurisio Pochettino bo‘lishini istamoqda.

“PSJ” va “Tottenhem” sobiq bosh murabbiyi yozda Braziliya terma jamoasini boshqarishi mumkin bo‘lgan Karlo Anchelottiga o‘rinbosar sifatida ko‘rilmoqda.

Peresning shaxsan o‘zi Pochettinoni munosib nomzod sifatida ko‘rmoqda. “Madrid”ning boshqa vakillari esa hozirda “Kastilya”da faoliyat olib borayotgan Raulni bosh murabbiy sifatida olib kelish kerak deb hisoblaydi. 

So‘nggi qaror Peres tomonidan qabul qilinishi hisobga olinsa, argentinalik mutaxassisning Ispaniyaga kelish ehtimoli katta.

Maurisio Pochettino bir necha kun avval “Tottenhem”ning taklifiga rad javobini berdi. Shuningdek, murabbiyga “Ayaks”, “Chelsi” hamda Braziliya terma jamoalari qiziqish bildirgan. Mutaxassisning o‘zi ham “qaymoqranglilar”ni boshqarishga qarshi emas.