Farg‘onada Qirg‘izistondan keltirilgan psixotrop moddalar savdosi bilan shug‘ullanganlar ushlandi
DXXning Farg‘ona viloyati bo‘yicha boshqarmasi xodimlari tomonidan giyohvandlik vositalarining noqonuniy aylanmasiga qarshi tezkor tadbirlar o‘tkazildi, deb xabar beradi O‘zA.
Xususan, Farg‘ona tumanida yashovchi 1993-yilda tug‘ilgan, muqaddam sudlangan shaxs qirg‘izistonlik tanishi bilan 4 ming dona “Tramadol”, 5,3 ming dona “Regapen” va 32 dona “Tropikamid” kuchli ta’sir qiluvchi dori vositalarini sotib olishga kelishgan. U mazkur dori vositalari uchun oldindan 1,2 ming dollar bergan, qolgan pullarni esa dorilarni sotib bo‘lganidan keyin bermoqchi bo‘lgan.
O‘z navbatida qirg‘izistonlik narkosavdogarlar uning buyurtmasini aylanma yo‘llar orqali O‘zbekiston hududiga o‘tkazib beradi. Ushbu shaxs Rishton tumaniga borib, 2,8 ming dona “Tramadol”, 560 dona “Regapen” va 10 dona “Tropikamid” kuchli ta’sir qiluvchi dori vositalarini Qo‘qon shahrida yashovchi 1989- va 1990-yilda tug‘ilgan ikki xaridorga 13 million so‘m hamda 100 dollarga sotib, Qo‘qon—Farg‘ona yo‘nalishida harakatlanayotganiga ushlangan.
Shuningdek, ushbu fuqarodan giyohvandlik vositalarini sotib olgan qo‘qonlik ikki xaridor ham qo‘lga olinib, ulardan ham ashyoviy dalillar tegishli tartibda olib qo‘yilgan.
Bundan tashqari, narkosavdogarning ko‘rsatmasi asosida uning yashash xonadonidan tovarning qolgan qismi — 600 dona “Tramadol”, 4,7 ming dona “Regapen”, 172 dona “Tropikamid” protsessual tartibda rasmiylashtirilgan.
O‘tkazilgan tezkor tadbir davomida umumiy bahosi 1,5 milliard so‘mni tashkil etuvchi giyohvandlik vositalari musodara qilindi.
Boshqa bir holatda esa Rishton tumanida yashovchi 1987-yilda tug‘ilgan ayolning yashash xonadoni ko‘zdan kechirilganda kelgusida sotish maqsadida Qirg‘izistondan keltirilgan 682 million so‘mlik 3,3 ming donadan ziyod “Regapen”, ming donadan ortiq “Tropikamid” rasmiylashtirib olingan.
Shuningdek, ayolning jinoiy sherigi bo‘lgan Qo‘qon shahrida yashovchi 1986-yilda tug‘ilgan fuqaro ham ushlangan.
Hozirda mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.
Avvalroq Andijonda Qirg‘izistondan olib kelingan gashishni 1,6 ming dollarga sotmoqchi bo‘lgan 37 yoshli ayol ushlangani to‘g‘risida xabar berilgandi.
