Rossiya bankining yangilangan hisob-kitoblariga ko‘ra, 2023-yil 1-yanvar holatiga Rossiya Federatsiyasining tashqi qarzi 380,5 milliard dollarni tashkil etdi. 2022-yilda bu ko‘rsatkich 101,81 milliard dollarga kamaydi.
“Rossiya Federatsiyasining tashqi qarzi asosan kreditlarni to‘lash, shu jumladan, to‘g‘ridan to‘g‘ri investitsiya munosabatlari doirasida va suveren qimmatli qog‘ozlar bo‘yicha qarzlarning qisqarishi hisobiga kamaydi”, — deyiladi regulyator bayonotida.
Qisqa muddatli majburiyatlar umumiy qarzda 69,19 milliard dollarni, uzoq muddatli majburiyatlar esa 311,35 milliard dollarni tashkil qiladi.
Rossiya tashqi qarzining qisqarishi ko‘proq xalqaro moliyaviy tashkilotlar ushbu davlatga Ukrainadagi urush sabab qarz berishni to‘xtatgani bilan bog‘liq.
Urushdan so‘ng bir yil ichida Ukrainaning qarzi 120 mlrd dollarga yaqinlashgan. Yil oxirigicha bu ko‘rsatkich 170 mlrd dollarga yetishi prognoz qilinmoqda.
Rossiya va Ukraina o‘rtasida urush boshlangandan keyin Ukraina AQSH va Yevropa Ittifoqidan qarz jalb qilishni ko‘paytirdi.
Izoh (0)