Qoraqalpog‘istondagi 452 ta mahallaning har biriga 500 million so‘mdan qo‘shimcha mablag‘ ajratiladi 

Ayni vaqtda prezident Shavkat Mirziyoyev raisligida Qoraqalpog‘iston Respublikasi Kegeyli tumanida yig‘ilish bo‘lib o‘tmoqda. Bu haqda “Daryo” muxbiri xabar berdi. 

Davlat rahbari Qoraqalpog‘iston mahallalarini obod qilish, suv, yo‘l, elektr taʼminotini yaxshilash, maktab, bog‘cha va tibbiyot punktlarini qurish va taʼmirlash uchun 2023-yilda 1,5 trillion so‘m berilayotganini taʼkidladi.

Bundan tashqari, 452 ta mahalladagi sharoiti og‘ir 21 mingta xonadon taʼmirlanadi, 709 ta uylar yangitdan qurib beriladi. Bunga byudjetdan 132 milliard so‘m, Toshkent shahri va viloyatlardan 232 milliard so‘m ajratilyapti.

Prezident Qoraqalpog‘iston aholisi farovonligini yanada oshirishga qaratilgan 3 ta yangi tashabbusni aytib o‘tdi.

“Qoraqalpog‘istondagi 452 ta mahallaning har biriga to‘g‘ridan-to‘g‘ri 500 million so‘mdan qo‘shimcha mablag‘ ajratiladi. Buning uchun alohida Qoraqalpog‘iston mahallalarini qo‘llab-quvvatlash jamg‘armasi tashkil qilinib, unga joriy yilda 250 milliard so‘m ajratamiz. Muammoni mahallaning o‘zi ko‘tarsin, o‘ziga pul beraylik, o‘zi nazorat qilsin. Shunda sifat va manfaat bo‘ladi. Odamlar rozi bo‘ladi”, — dedi Shavkat Mirziyoyev.

Prezident o‘ziga hududlardan uy-joylar kadastri masalasida juda ko‘p murojaatlar bo‘lishini aytdi.

“Qoraqalpog‘istonda ham 47 ming uy-joy va ko‘chmas mulklarning kadastri yo‘q. Bu – odamlarimizni ipoteka olish, tomorqasida dehqonchilikka kredit, subsidiya olish, yashayotgan boshpanasini farzandlariga meros qoldirish imkoniyatini cheklayapti. Ko‘p o‘ylab, Qoraqalpog‘iston aholisiga shu masalada yengillik yaratmoqchiman”, — dedi davlat rahbari.

Prezident Jo‘qorg‘i Kenges raisiga ikki oyda 38 ming odamning qo‘liga kadastri to‘liq qilib berish yuzasidan topshiriq berdi. 

Davlat rahbari o‘zi so‘zida davom etar ekan, Qoraqalpog‘istonda yiliga 6,5-7 mingta uy-joyga talab borligini alohida qayd etdi. 

“Shu bois, 2023-yil o‘tgan yilga nisbatan 2 baravar ko‘p yoki 4 mingta uy-joy quriladi. Bunga qo‘shimcha qilib, faqat Qoraqalpog‘iston aholisi uchun yangi imkoniyat yaratamiz. Yaʼni, zamonaviy loyiha asosida 4 ming yakka tartibdagi uy-joy qurishga 4 sotixdan yer ajratiladi. Infratuzilmasini ham qilib beramiz. Bunday imkoniyatni boshqa hududlarimizga bermaganmiz”, — dedi davlat rahbari.