O‘zbekistonda birinchi avtomatlashtirilgan smart sanitar-gigiyenik shoxobcha ishga tushirildi (foto)

Toshkent shahar Mirobod tumani Lokomotiv ko‘chasida birinchi avtomatlashtirilgan smart sanitariya-gigiyenik shoxobchasining ochilish marosimi bo‘lib o‘tdi. Bu haqda Turizm va madaniyat vazirligi matbuot xizmati xabar berdi.

Marzkur shoxobcha erkaklar, ayollar hamda nogironligi bo‘lgan shaxslarga mo‘ljallangan hojatxonalar, yuvinish xonasi hamda xodimlar xonasini o‘z ichiga olgan.

Madaniyat va turizm vazirligi bo‘lim boshlig‘i Muhayyo Hayitovaga ko‘ra, prezidentning tegishli farmoniga muvofiq, Madaniyat va turizm vazirligining tashabbusi bilan tadbirkorlik subyektlariga zamonaviy sanitar-gigiyenik shoxobchalarni qurish uchun 80—100 kvadrat metr o‘lchamda yer maydonlarini elektron auksionga qo‘ymasdan olish imkoniyati yaratilgan.

Ushbu imtiyoz natijasida respublika bo‘yicha 150 nafardan ortiq tadbirkorlik subyektlariga zamonaviy sanitar-gigiyenik shoxobchalar qurish uchun tegishli yer maydonlari ajratilgan. Kelgusida bunday shoxobchalar sonini yanada oshirish, boshqa hududlarda ham kun-u tun ishlaydigan shoxobchalar qurish rejalashtirilgan.

Ta’kidlanishicha, mazkur shoxobchaning boshqa shu singari shoxobchalardan asosiy afzalligi uning avtomat rejimda ishlashi va eng zamonaviy sanitar-gigiyenik moslamalar bilan jihozlanganida. Qolaversa, unda jismoniy imkoniyati cheklangan, nogironligi bo‘lgan shaxslar, yosh bolali ota-onalar qulay foydalanishlari uchun ham imkoniyatlar yaratilgan.

“Madaniyat va turizm vazirligi, Toshkent shahar hokimligi yordamida zamonaviy, hamma talabga javob beradigan shoxobchani qurib bitkazdik. Shoxobchani qurishda Xitoy, Belarus, Rossiya kabi xorijiy davlatlardan keltirilgan zamonaviy texnika vositalaridan foydalandik. Aholining har bir qatlami uchun qulaylik yaratishga harakat qildik”, — deydi tadbirkor Kamoliddin Danaboyev. 

Ma’lumot uchun, 2017-yilda jami 200 ta sanitar-gigiyenik shoxobcha faoliyat yuritgan bo‘lsa, 2022-yilga kelib ularning soni 7,5 mingdan oshgan. Shulardan 3,9 mingtasi yangi qurilgan, 3,6 mingtasi qayta ta‘mirlanib, foydalanishga topshirilgan.