“Toshkent hududiy elektr tarmoqlari” bosh hisobchi o‘rinbosari 15 ming dollar pora bilan qo‘lga tushdi
Toshkent viloyatida tadbirkorning muammosini hal qilib berish evaziga pora so‘ragan “Hududiy elektr tarmoqlari” korxonasi xodimiga hukm o‘qildi. Bu haqda “Zamon” informatsion dasturida ma’lum qilindi.
Qayd etilishicha, “Toshkent hududiy elektr tarmoqlari” korxonasining 46 yoshli bosh hisobchi o‘rinbosari o‘z mansab vakolatidan foydalanib tadbirkorni pora berishga qiziqtirgan. Ish hujjatlariga ko‘ra, “O‘zbekiston milliy elektr tarmoqlari” AJ tomonidan mutaxassis jalb qilingan holda Toshkent viloyati prokuraturasi va DXX tomonidan o‘tkazilgan tekshiruvda yakka tartibdagi tadbirkorga tegishli korxonada tekshirish o‘tkazilgan va yirik iste’molchining texnologik yo‘qotish miqdorini kam ko‘rsatgani aniqlangan. Bundan xabar topgan sudlanuvchi tadbirkorga tekshiruvchi tanishi ekanini aytib, holatni uning foydasiga hal qilib berish evaziga 15 ming dollar so‘ragan.
U Toshkent shahar Yashnobod tumanida kelishilgan pulni firibgarlik yo‘li bilan qo‘lga kiritgan vaqtida departamentning Toshkent viloyati boshqarmasi, viloyat prokuraturasi va DXX xodimlari tomonidan ushlangan.
Sudlanuvchi Jinoyat kodeksining tegishli moddalari bilan aybli deb topilib, 6 yil-u 6 oy muddatga ozodlikdan mahrum etildi.
Avvalroq O‘zbekistonda bir kunda 2,5 milliard so‘mdan ortiq elektrdan noqonuniy foydalanish holatlari aniqlangani to‘g‘risida xabar berilgandi.
