Prezident administratsiyasi sho‘ba mudiri Saida Mirziyoyeva Oq uyda Jo Baydenning yordamchisi va AQSH Prezidenti administratsiyasining gender siyosati bo‘yicha Kengashi direktori Jennifer Klyayn bilan uchrashdi. Bu haqda u o‘zining Telegram’dagi sahifasi orqali ma’lum qildi.
Qayd etilishicha, tomonlar O‘zbekistonda davlat rahbari tomonidan olib borilayotgan muhim islohotlar haqida suhbatlashgan.
Suhbatning asosiy mavzularidan biri — xotin-qizlarni gender zo‘ravonlikdan himoya qilish va O‘zbekistonda unga yo‘l qo‘ymaslik uchun amalga oshirilayotgan ishlar bo‘lgan.
“Umuman, muloqotimiz ochiq va samimiy bo‘lib o‘tdi. O‘zbekistonning Jinoyat va Maʼmuriy javobgarlik to‘g‘risidagi kodekslariga ayollar va voyaga yetmaganlarga nisbatan zo‘ravonlik jinoyatini nazarda tutuvchi o‘zgartirishlar faqat qog‘ozda qolmasligi uchun zarur chora-tadbirlarni atroflicha muhokama qildik. Jennifer Klyayn bu borada amaliy yordam berishni taklif qildi. Shuni inobatga olgan holda, kelgusida aloqalarimizni yanada mustahkamlash va kengaytirish imkoniyatiga ega bo‘lamiz, deb o‘ylayman”, — deb yozadi Mirziyoyeva.
Avvalroq Saida Mirziyoyeva Vashingtonda “Tinchlik korpusi” bosh direktori o‘rinbosari Tomas Pen bilan uchrashgani to‘g‘risida xabar berilgandi.
Izoh (0)