Qashqadaryo viloyatining Qarshi tumanida minglab yoshlar ishtirokida “Konstitutsiya o‘zimizniki” shiori ostida targ‘ibot tadbiri bo‘lib o‘tdi. Bu haqda tadbirda ishtirok etgan “Daryo” muxbiri xabar berdi.
Tadbirda Qarshi davlat universitetining Fransuz tili va adabiyoti kafedra mudirasi Aziza Zoirova so‘z olib, yoshligida maktabda xorijiy til fani o‘qituvchisi bo‘lishni orzu qilgani hamda o‘qituvchilarga yaratilgan imkoniyatlar haqida gapirdi.
“Men yoshligimdan maktabimda xorijiy til fani o‘qituvchisi bo‘lishini orzu qilardim. Hozir esa oliy dargohda farzandlarimizga fransuz tilidan taʼlim berib kelmoqdaman. Bolalikdagi orzum bugungi kunga kelib o‘z ro‘yobini topdi. Endi farzandlarimiz eng zamonaviy maktablarda ikkita xorijiy til hamda bitta hunar o‘rganib, mustaqil hayotga qadam qo‘yishadi. Eng quvonarlisi shuki, yangi tahrirdagi Konstitutsiyamizda biz o‘qituvchilar bilan bog‘liq moddalar ham kiritilmoqda. Bunda davlatimiz tomonidan men kabi o‘qituvchilarning ijtimoiy va moddiy farovonligi, kasbiy jihatdan o‘sishi to‘g‘risida g‘amxo‘rlik qilishi belgilab qo‘yilyapti. Bu esa o‘z navbatida men kabi o‘qituvchilarning jamiyatdagi ijtimoiy mavqeyi hamda obro‘sini yana-da oshiradi”, — deydi Aziza Zoirova.
Tadbirda so‘zga chiqqanlar yangi tahrirdagi Konstitutsiyaning har bir moddasi inson qadri uchun xizmat qilishini taʼkidladi. Shuningdek, yig‘ilganlarni Referendum saylovlarida faol ishtirok etishga chorladi.
Izoh (0)