Fevralda oltin sotilmadi: O‘zbekiston tashqi savdosi ikki oyda 8,9 mlrd dollarga yetdi

2023-yil yanvar—fevral oyida O‘zbekistonning tashqi savdo aylanmasi 8,9 mlrd dollarga yetdi. Bu haqda Statistika agentligi xabar bermoqda. 

Mazkur ko‘rsatkich 2022-yilning mos davriga nisbatan 176,4 mln dollarga yoki 2 foizga ko‘paydi.

Tashqi savdoda eksport hajmi 3,2 mlrd dollarga (2022-yilning yanvar—fevral oylariga nisbatan 23,7 foizga ko‘paydi) va import hajmi 5,8 mlrd dollarga (25,1 foizga ko‘paydi) yetdi. 

Yil boshidan beri 2,6 mlrd dollarlik manfiy tashqi savdo balansi qayd etildi. 

O‘zbekiston dunyo bo‘ylab 155 mamlakat bilan savdo aloqalarini amalga oshirib kelmoqda. Tashqi savdoning nisbatan salmoqli hissasi Rossiya (16,2 foiz), Xitoy (14,9 foiz), Qozog‘iston (7,8 foiz), Germaniya (6,4 foiz), Turkiya (6,1 foiz), Koreya (3,4 foiz) va Qirg‘iz Respublikasiga (1,9 foiz) to‘g‘ri kelmoqda. 

2022-yilning mos davriga nisbatan O‘zbekiston tashqi savdosida MDH davlatlarining ulushi ko‘paygan. 

O‘zbekiston yanvarda 1,2 mlrd dollarlik oltin sotgan edi. Fevral oyida esa mamlakat narxlar pastligi sabab oltin sotmadi. 

Eksport tarkibida tovarlar ulushi 82,2 foizni tashkil etib, ular sanoat tovarlari (19,4 foiz), oziq-ovqat mahsulotlari va tirik hayvonlar (7 foiz) va turli xil tayyor buyumlar (6 foiz) hissasiga to‘g‘ri kelmoqda. 

Import tarkibida esa eng katta ulush, mashinalar va transport asbob-uskunalari (41,3 foiz), sanoat tovarlari (14,8 foiz) hamda kimyoviy vositalar va shunga o‘xshash mahsulotlar (13,8 foiz) hisobiga to‘g‘ri keldi.

Germaniyaning yanvarda asosiy import hamkoriga aylangani esa vaqtinchalik holat bo‘lib chiqdi.