O‘zbekiston “Tolibon” bilan ayollar huquqlarini himoya qilish, qizlarning taʼlim olishini taʼminlash kabi masalalarni muhokama qildi
O‘zbekiston delegatsiyasining Afg‘onistonda “Tolibon” rasmiylari bilan muzokaralar o‘tkazgani to‘g‘risida xabar berilgandi. “Dunyo” agentligining yozishicha, Toshkent va Kobul ikki tomonlama savdo-iqtisodiy aloqalarni kengaytirish, Afg‘oniston hududi orqali turli tranzit yuklarni tashish hajmini oshirish kabi masalalarni muhokama qilgan.
TIV maʼlumotiga ko‘ra, Kobulda O‘zbekiston delegatsiyasi Afg‘oniston bosh vaziri o‘rinbosari vazifasini bajaruvchi mulla Abdul G‘ani Barodar, tashqi ishlar vaziri vazifasini bajaruvchi Amirxon Muttaqiy, mudofaa vaziri vazifasini bajaruvchi mulla Yoqub Mujohid, muvaqqat hukumatning boshqa aʼzolari va iqtisodiy tuzilmalar vakillari bilan qator uchrashuvlar o‘tkazgan.
Muzokaralar chog‘ida o‘zaro savdo-iqtisodiy aloqalarni kengaytirish, Afg‘oniston hududi orqali turli tranzit yuklarni tashish hajmini oshirish kabi masalalar muhokama qilingan.
Muhim transport-energetika loyihalarini amalga oshirish, xususan, Termiz—Mozori-Sharif—Kobul—Peshovar temiryo‘lini qurish, Surxon—Puli-Xumri yo‘nalishi bo‘ylab elektr tarmog‘ini tortish masalalari alohida ko‘rib chiqilgan.
Tomonlar ishning amaliy bosqichiga tezroq o‘tish zarurligini taʼkidlagan va ikki tomonlama kun tartibidagi barcha masalalar bo‘yicha konstruktiv muloqotni davom ettirishga tayyor ekanliklarini tasdiqlagan.
Muloqot chog‘ida ayollar huquqlarini hurmat qilish va himoya qilish, qizlarning Afg‘onistonda taʼlim olishini taʼminlash, shuningdek, Termiz shahridagi Taʼlim markazi negizida afg‘on kadrlarini tayyorlash zarurligi taʼkidlangan.
Uchrashuvlar doirasida suv-energetika sohasidagi hamkorlik masalalariga alohida eʼtibor qaratilgan.
“Muzokaralar o‘zaro anglashuv ruhida o‘tdi va muhokama qilingan masalalar yuzasidan tomonlar o‘zaro hamkorlikni yanada kengaytirish istagini bildirdi”, — deyiladi xabarda.
