Toshkent viloyati Parkent tumanida dam olishga borib, kuchli yomg‘ir oqibatida adirlikda qolib ketgan 47 kishi va 13 ta mashina pastga olib tushildi. Bu haqda FVV axborot xizmati xabar berdi.
Xabarga ko‘ra, 20-mart kuni soat 19:30 da Toshkent viloyati Favqulodda vaziyatlar boshqarmasiga fuqarolar tomonidan xabar kelib tushgan. Parkent tumani Qiziltog‘ shaharchasi atrofidagi adirliklarga o‘z avtomobillarida dam olish maqsadida borganlar kuchli yomg‘ir yog‘ishi natijasida adirliklarda qolib ketgani va pastga tusha olmayotganini aytib, yordam kerakligini maʼlum qilgan.
Qayd etilishicha, aytilgan manzilga zudlik bilan qutqaruvchilar 7 ta maxsus texnika bilan yetib borib, qidiruv-qutqaruv ishlarini olib borgan. Amalga oshirilgan tezkor saʼy-harakatlar natijasida qutqaruvchilar tomonidan dam oluvchilarning 13 ta mashinasi hamda 47 nafar fuqaro xavfsiz joyga olib tushilgan.
Yuzaga kelgan vaziyat oqibatida halok bo‘lgan va tan jarohati olgan fuqarolar yo‘q.
Izoh (0)