Moskvadagi turar joy majmuasi qurilishida Tojikiston va O‘zbekiston fuqarolari o‘rtasida ommaviy mushtlashuv sodir bo‘lgani haqida xabar berilgan edi. Tashqi mehnat migratsiyasi agentligi axborot xizmati bu bo‘yicha maʼlumot berdi.
Xabarga ko‘ra, ommaviy mushtlashuvga shu yilning 18-mart kuni oshxonada navbat kutish vaqtida yuzaga kelgan tushunmovchilik sabab bo‘lgan. Tortishuv 50-60 nafar fuqaro ishtirokida ommaviy mushtlashuvga aylangan.
Voqea joyiga zudlik bilan yetib kelgan ichki ishlar xodimlari tomonidan olib borilgan tezkor tadbirlar natijasida 40 ga yaqin ishchi qo‘lga olinib, vaziyatga oydinlik kiritish uchun ichki ishlar bo‘limiga olib ketilgan.
Qayd etilishicha, qo‘lga olinganlar so‘roq qilinib, tushuntirish xati yozilgach, qo‘yib yuborilgan. Og‘ir tan jarohati olgan va jabrlanganlar orasida O‘zbekiston fuqarolari yo‘q. Yaqin kunlarda konsullik bo‘limi va Tashqi mehnat migratsiyasi agentligining Moskvadagi vakolatxonasi xodimlari vaziyatga oydinlik kiritish uchun qurilish kompaniyasi rahbariyati bilan uchrashuv o‘tkazishni rejalashtirmoqda.
Izoh (0)