Oliy Majlis Senatining Fan, taʼlim va sog‘liqni saqlash masalalari qo‘mitasi ishchi guruhi tomonidan Qoraqalpog‘iston Respublikasi hamda Xorazm viloyati hududidagi boshlang‘ich sinf o‘quvchilariga bepul ovqat berish tizimi joylarga chiqib, ayrim maktablar misolida o‘rganildi. Bu haqda parlament yuqori palatasi matbuot xizmati xabar berdi.
Hozirgi kunda Qoraqalpog‘iston Respublikasidagi 716 ta maktabning 143 688 nafar boshlang‘ich sinf o‘quvchilariga keytering tizimida faoliyat yurituvchi tadbirkorlik subyektlari tomonidan bepul nonushta berilishi yo‘lga qo‘yilgan.
O‘z navbatida, Fan, taʼlim va sog‘liqni saqlash masalalari qo‘mitasi raisi O.Iminov boshchiligidagi ishchi guruh tomonidan Qoraqalpog‘iston Respublikasining Chimboy, Kegeyli, To‘rtko‘l hamda Qo‘ng‘irot tumanlaridagi 10 ga yaqin maktablardagi holat yaqindan o‘rganilgan.
O‘rganish jarayonida tadbirkorlar tomonidan keytering xizmati o‘z vaqtida sifatli ko‘rsatilayotgani maʼlum bo‘lgan. Biroq mazkur jarayonlarda oziq-ovqat yetkazib berish jarayonida ayrim befarqliklarga yo‘l qo‘yilayotgani aniqlangan. Jumladan, Chimboy va Kegeyli tumanlariga mahsulotlar keytering tashkiloti tomonidan yo‘lovchi tashuvchi Damas avtomashinalarida yetkazib berilayotgani ko‘zga tashlangan. Kegeyli tumanidagi ayrim maktablarda mahsulotlarni qabul qilib olish jarayonida eʼtiborsizlikka yo‘l qo‘yilgani tasdiqlangan. Mazkur maktab direktorlari sifatsiz mahsulotlarni qabul qilib olgani uchun sanitariya va epidemiologik osoyishtalik va jamoat salomatligi xizmati tomonidan jarimaga tortilgan.
Shuningdek, senator Manzura Salimova boshchiligidagi ishchi guruh esa Xorazm viloyatidagi holatni o‘rgangan.
Qayd etilishicha, 2022-yilda boshlang‘ich sinflar mavjud bo‘lgan umumiy o‘rta taʼlim maktablari 524 tani (boshlang‘ich sinf o‘quvchilari jami 137 261 nafar), 2023-yilda 525 tani (boshlang‘ich sinf o‘quvchilari jami 137 030 nafar) tashkil etgan.
Xorazm viloyati xalq taʼlimi boshqarmasiga 2022-yilda budjet mablag‘lari hisobidan jami 58 milliard 149,5 million so‘m ajratilgan bo‘lib, shundan 47 milliard 869 million so‘mi ovqatlantirish xarajatlari uchun ajratilgan.
Xalq taʼlimi vazirligi tomonidan Sanitariya-epidemiologik osoyishtalik va jamoat salomatligi xizmati bilan kelishilgan holda o‘quvchilarni ovqatlantirish uchun mo‘ljallangan 5 kunlik taomnoma va taom tayyorlash bo‘yicha texnologik kartalar tasdiqlangan.
Bu borada senator Manzura Salimova Gurlan, Shovot, Yangiariq tumanlari va Xiva shahridagi umumtaʼlim maktablariga yetkazib berilayotgan bepul oziq-ovqat mahsulotlari sifatini ko‘zdan kechirgan.
O‘rganishlar natijasida, yetkazib berilgan mahsulotlar tarkibi va sifati ustidan nazoratni taʼminlash maqsadida tuzilgan maxsus komissiya vazifalari belgilab berilmagan. Mahsulotlar sifatini nazorat qilish jurnali yuritilmagan. Qabul qilib olingan mahsulotlar qadog‘ida ishlab chiqarish muddati ko‘rsatilmagan holda, qabul qilingan.
Bu borada senator tadbirkor va maktab masʼullariga belgilangan tartib-qoidalarga qatʼiy amal qilish, mahsulotlarni saqlashda sanitariya va gigiyena talablariga rioya qilish kerakligi yuzasidan o‘z taklif hamda tavsiyalarini bildirgan.
Yuqorida aniqlangan ayrim kamchiliklarni tezkor bartaraf etish, ishni tizimli davom ettirish yuzasidan joylarda tushuntirish ishlari olib borilgan, maktab direktorlari hamda tadbirkorlar ishtirokida seminarlar o‘tkazilgan.
Avvalroq Qoraqalpog‘istondagi ayrim maktablarda o‘quvchilarga sifatsiz oziq-ovqat mahsulotlari berilgani aniqlangandi. Xususan, bolalarga berilayotgan oziq-ovqat mahsulotlari belgilangan meʼyorga javob bermasligi, shuningdek, ichimlik suvi bilan taʼminlanmagani, issiq choy bilan taʼminlash uchun esa sharoit to‘liq yaratilmagani maʼlum bo‘lgan edi.
Izoh (1)
Sifatsiz maxsulot yetkazgani uchun tadbirkorga chora ko'rilmaganmi? Yana o'qituvchi ustoz ayibdormi?It ham mushuk ham ustozni jazolaydimi?Menimcha senatni tarqatib yuborish kerak.Chunki birnarsani do'ndirgani yo'q.Quyi palata bilan bir hil.