2023-yilning yanvar oyida O‘zbekiston 2 193 ta yengil avtomobil import qilgan. Bu haqda “Daryo”ga Statistika agentligi matbuot xizmati rahbarining rasmiy kanalidan ma’lum bo‘ldi.
Ma’lumotlarga ko‘ra, yanvar oyida mamlakatga 13 ta xorijiy davlatdan qiymati 58,3 mln dollarga avtomobil olib kelingan.
Natijada, yengil avtomobillar importi o‘tgan yilning mos davri bilan solishtirilganda 847 taga kamaygan.
O‘zbekistonning tashqi savdo aylanmasi hisobotiga ko‘ra, yanvar oyida O‘zbekistonning avtomobil eksporti hajmi 9,9 mln dollarni tashkil etdi. Bu o‘tgan yilning mos davriga nisbatan 13,4 foizga ko‘p.
Shunday qilib, yanvar yakuni bo‘yicha avtomobil importi eksportdan 48,4 million dollar — 5,8 martaga oshgan.
Shu tariqa O‘zbekiston avtomobillarni sotishdan ko‘ra ko‘proq sotib olishda davom etmoqda.
2022-yilning oktabr oyidan boshlab, O‘zbekistonning avtomobil importi ko‘rsatkichlari “Tashqi savdo aylanmasi” hisobotidan joy olmaydi. Biroq, Statistika agentligi matbuot xizmati rahbarining rasmiy kanalida yoritilgan.
2022-yil yakunlari bo‘yicha ma’lumotlar esa ushbu kanalda ham, Statistika agentligining hisobotida ham ochiqlanmay qolgan.
“Daryo” muxbirining masala yuzasidan yuborgan so‘rovlariga “Dekabr oyi uchun statistik ma’lumotlar tez orada yoritilishi, bu yopiq ma’lumot emasligi” haqidagi izoh kelgan.
Avvalroq 2022-yilning yanvar—noyabr oylari uchun avtomobil import va eksport ko‘rsatkichlari tahlil qilingan edi.
Izoh (0)