Bugun barchamiz Merayya Kerini beqiyos vokallari va betakror qo‘shiqlari tufayli bilamiz. Biroq ko‘plab mukofotlar, shu jumladan 5 ta “Gremmi” mukofoti sohibasi bunday muvaffaqiyatga qanday erishgani, qanday qiyinchiliklarni boshdan kechirgani haqida ko‘pchilik bilmaydi.
Merayya Keri sobiq opera xonandasi Patrisiya Xikki hamda afro-amerikalik va venesuelalik muhandis Alfred Roy Keri oilasida tug‘ilgan. Merayya ularning uchinchi, kenja farzandi edi. Qizning ismi “Oltin Kaliforniya” musiqiy filmidagi “Ular shamolni Merayya deb atashadi” (They Call the Wind Maria) qo‘shig‘i sharafiga berilgan.
Tez orada ota-onasi ajrashishadi. Shundan so‘ng Merayya otasi bilan deyarli aloqa qilmaydi, onasi esa bolalarini boqish uchun uchta joyda ishlaydi. Merayya boshlang‘ich maktabda bo‘lganida ham, ko‘pchilik qizning adabiyot va musiqaga moyilligini va o‘rta maktabda u allaqachon she'r yozishni boshlaganini payqashadi.
Onasi qiziga vokal o‘rgatishni boshlaydi, lekin hech qachon unga opera qo‘shiqchisi bo‘lishi kerakligini aytmaydi, chunki Merayyaning so‘zlariga ko‘ra, “u qattiqqo‘l ona emasdi”. Kerining o‘zi bir necha bor opera uning karyerasini ko‘tarishga ta'sir qilmaganini aytadi. Bir kuni onasi qiziga shunday degan: “Sen men kabi qo‘shiqchilarning kamida yarmidek bo‘lishingga umid qilishing mumkin”. Merayya tez-tez maktabdagi darslarni qoldirgan, chunki u ovoz yozish studiyasiga borardi. Shunday qilib, sinfdoshlari unga Miraj laqabini berishdi.
O‘rta maktabni tugatgandan so‘ng Keri Manhettendagi 2 xonali kvartiraga ko‘chib o‘tadi, u yerda go‘zallik maktabi kurslariga boradi va bir muddat ofitsiant ham bo‘lib ishladi — keyinchalik o‘zi tan olganidek, u “dunyodagi eng yomon ofitsiant” bo‘lgan.
1988-yilda qiz 19 yoshligida, u Columbia Records rahbari Tommi Mottola bilan bir tadbirda tanishib qoladi va unga o‘zining demolari yozilgan kassetani sovg‘a qiladi. Uyga ketayotib, qo‘shiqlarni tinglagan Mottola darhol haydovchidan orqaga qaytishni so‘raydi, lekin qo‘shiqchi bu vaqtga qadar tadbirdan chiqib ketgandi. Mottola 2 hafta davomida Kerini qidiradi, keyin ular shartnoma imzolaydilar va 1-albomni chiqarishga tayyorgarlik ko‘rishadi. 1990-yil 5-iyunda qiz birinchi marta qo‘shiq kuylab, omma oldida paydo bo‘ladi.
Merayya Kerining debyut albomi 1990-yilda chiqadi va 11 hafta davomida Billboard 200 ro‘yxatida birinchi o‘rinni egallaydi. 1991-yilda “Gremmi” mukofotining taqdirlash marosimi bo‘lib o‘tadi, unda qo‘shiqchi “Eng yaxshi yangi ijrochi” va “Eng yaxshi ayol pop-vokal ijrosi” nominatsiyalarida 2 ta mukofotga sazovor bo‘ladi. Shu bilan birga, Keri tijorat muvaffaqiyatiga erisha olmagan, ammo musiqiy ufqda iz qoldirgan 2-albomni chiqaradi. 1990-yillarning o‘rtalarida xonanda minnatdorlik sifatida onasiga uy sovg‘a qiladi.
1993-yilda Merayya Tommi Mottolaga turmushga chiqadi, u birinchi albomni yozish paytidayoq uchrasha boshlashgandi. Biroq asta-sekin ularning munosabatlari yomonlasha boshlaydi. Xonandaning ta‘kidlashicha, eri uning butun hayotini boshqarishni istagan: “U mendan ancha katta bo‘lib, meni ko‘pchilikdan uzoqlashtirishga qodir edi. Men bu asirlikdan hech qachon qutulolmayman deb o‘ylagandim”. 3 yillik turmushdan keyin ular ajralishga qaror qilishadi. Merayyaning aytishicha, nikohining buzilishi u uchun ozodlik bo‘lib, uni yangi hayot deb bilgan. Keyinchalik u qo‘shiqchi Luis Migel bilan 1998-yildan 2001-yilgacha uchrashib yurgan.
Shu bilan birga, Keri o‘z ijodida agar pop musiqasini to‘liq rad etmasa, hech bo‘lmaganda qisman qo‘shiqlarida hip-hop va R&B elementlaridan foydalana boshlaydi. 1999-yilda xonanda o‘zining 7-diski (“Kamalak”)ni chiqaradi, u o‘sha paytda sotuvning birinchi haftasidayoq xonandaning eng ko‘p sotilgan albomiga aylanadi. Shu bilan birga, Keri Billboard versiyasiga ko‘ra o‘n yillikning eng yaxshi qo‘shiqchisi deb tan olinadi va 2000-yilda World Music Award mukofotini topshirish marosimida u “Mingyillikning eng kassabop xonandasi” mukofotiga sazovor bo‘ldi.
2001-yilda Keri sog‘lig‘i bilan bog‘liq muammolarni boshdan kechira boshladi, u asabiy tushkunlik tufayli kasalxonaga yotqizildi. Shu bilan birga, Merayyaga bipolyar buzilish tashxisi qo‘yilgan, ammo u buni 17 yildan keyingina tan oladi.
Keri 2 hafta davomida shifokorlar nazoratida bo‘ladi, keyinchalik esa uzoq vaqt omma oldida ko‘rinmaydi. 2002-yilda u “Ayollar mantig‘i” filmida rol o‘ynaydi, filmdagi xonandaning ijrosi barchada katta taassurot qoldiradi. Shu bilan birga, uning 9-chi Charmbracelet albomi chiqadi — tanqidchilar uni xonanda karyerasidagi eng yomon albom deb atashgan.
Keyingi “Mimining ozodligi” albomi ham jamoatchilik, ham tanqidchilarning sevgisi va e'tirofiga sazovor bo‘ladi. Ko‘pchilik, nihoyat, qo‘shiqchi avvalgi holatiga qaytganini aytishadi. Keyinchalik u musiqa yozishni va filmlarda o‘ynashni davom ettiradi, xususan, “Tennessi”, “Zohan bilan hazillashmang” filmlarida ishtirok etadi, “Xazina” filmidagi ijrosi mukammal deb tan olinadi.
2008-yilda qo‘shiqchi “Bye Bye” qo‘shig‘iga klip olish paytida aktyor va musiqachi Nik Kannon bilan tanishadi, keyinchalik unga turmushga chiqadi. 2011-yilda xonanda egizak farzandlarni dunyoga keltiradi: qizi Monro va o‘g‘li Marokkano Skott. Intervyulardan birida Keridan turmush o‘rtog‘i bilan o‘rtasidagi 11 yosh farq haqida so‘rashganda, u “Yosh bu — shunchaki raqam” deb javob beradi. Biroq 2014-yilda oila buziladi va ajralish jarayoni 2016-yilda yakunlanadi.
2012-yil mart oyida Keri farzandlari tug‘ilgandan beri birinchi marta omma oldida chiqish qiladi, filmlarda rol o‘ynashda va qo‘shiq yozishda davom etadi. 2015-yilda u hatto o‘zini rejissor sifatida sinab ko‘radi — o‘zi bosh rolni o‘ynagan “Rojdestvo ohangi” filmini suratga oladi. Shu bilan birga, rassom o‘zining yangi shousini e'lon qilad. 2016-yilda xonanda haqida hujjatli film chiqadi. “Menimcha, bu mening aslimni ko‘rsatish uchun yaxshi imkoniyat, chunki eng sodiq muxlislarim ham men haqimda to‘g‘ri tasavvurga ega emaslar”.
2015-yilda Merayya milliarder Jeyms Paker bilan uchrashishni boshlaydi. Yanvarda ular o‘zlarining unashtirilganliklarini e'lon qilishadi, ammo keyin uni bekor qilishadi. 2016-yilda Keri xoreograf Brayan Tanaka bilan munosabatlarni boshlaydi va hozirgacha ular birga.
Faoliyatining dastlabki yillarida Keri sahnaga chiqishdan qo‘rqadi. Xonanda qo‘shiqlarni ijro etish paytida shunchaki sahnada turishni afzal ko‘rishi bilan mashhur. Ba'zi tanqidchilar buni o‘ziga ishonchi yo‘qligi bilan bog‘lashsa, boshqalari esa shu tarzda u vokalga e'tibor qaratadi, deb aytishadi.
Qo‘shiqchining aytishicha, kompozitsiyalarining aksariyati avtobiografik xarakterga ega. Keri uchun vokal uni ilhomlantirgan his-tuyg‘ular emas, balki professionallikdir.
Keri juda ko‘p mukofotlarni qo‘lga kiritadi, jumladan 5 ta “Gremmi”. Merayya 2015-yilda Gollivud Shon-sharaf xiyobonida o‘z yulduz ga ega bo‘ladi. Uning Merry Christmas albomi 15 million nusxadan ko‘proq sotilgan va bu barcha davrlarning eng ko‘p sotilgan Rojdestvo albomiga aylandi. All I Want for Christmas Is You qo‘shig‘i esa Ginnesning rekordlar kitobiga uch marta kirgan. U Maykl Jekson va Elvis Preslidan ko‘ra ko‘proq xit qo‘shiqlarga ega.
Merayya Kerining juda hashamatli turmush tarzini olib boradigan bir nechta itlari bor. Xonanda ularni kurort muolajalari bilan erkalaydi, aviakompaniya cheklovlaridan qochish uchun ular bilan shaxsiy samolyotida sayohat qiladi va tez-tez o‘zi bilan ta'tilga olib boradi.
Merayya bir kun kelib boy va mashhur bo‘lishini o‘ziga qayta-qayta aytgan paytini aniq eslaydi: “Men 5-6 yoshda edim. Opam bilan supermarket parkovkasida onamning eski mashinasi oynasidan badavlat odamlarga qarab o‘tirardim. Keyin men albatta, yulduz bo‘laman va eng yaxshi narsalarni sotib olaman, dedim”.
Shuningdek, xonanda o‘z intervyularidan birida hech qachon taslim bo‘lmaslik kerakligini, agar inson o‘ziga ishonsa va nima istayotganini bilsa, albatta o‘zi xohlagan narsaga erishishini aytadi.
Izoh (0)