Turkiyada 2023-yilning 6-fevral kuni sodir bo‘lgan qator zilzilalar tufayli mamlakat janubi-sharqidagi “Iskenderun” portiga katta zarar yetdi. Bu haqida Turkiya Transport va infratuzilma vazirligi qoshidagi Dengizchilik ishlari bosh boshqarmasiga tayanib EastFruit xabar bermoqda.
“Konteynerlarning ba’zilari bir-birining ustiga tushgan, eng pastki qismda joylashganlari esa deformatsiyalangan, ulardan mevalar — apelsin va limon to‘kilgan. Ayrim ag‘darilgan konteynerlar yonib ketdi, olovni o‘t o‘chirish kemalari yordamida o‘chirishga harakat qilindi”, — deyiladi xabarda
“Iskenderun” — Turkiyaning eng yirik portlaridan biri bo‘lib, 2022-yili ushbu portning umumiy yuk aylanmasi 67,6 million tonnani tashkil etgan edi.
Turkiya Transport va infratuzilma vazirligi qoshidagi Dengizchilik ishlari bosh boshqarmasi ma’lumotlariga ko‘ra, mamlakatning boshqa dengiz portlari zilzilalardan zarar ko‘rmagan.
Temir yo‘lda ham ko‘pgina zarar qayd etilgan — Turkiya janubida joylashgan Gaziantep mintaqasidagi temir yo‘llar shikastlangan.
Yo‘lning bir qismiga zarar yetgan, yuk tashuvchi yarimvagonlar ag‘darilgan. Mamlakat janubi va janubi-sharqida temir yo‘l aloqasi to‘xtatilgan.
Bundan tashqari, mamlakat ichki va xalqaro transport tizimida ham logistika qalin qor yog‘ishi tufayli murakkablashgan. Murakkab ob-havo sabab kemalar Turkiya qirg‘oqlariga yetib kelolmayapti.
Izoh (0)