Oʻzbekistonning yanvar oyidagi budjet daromadi ochiqlandi

Oʻzbekistonning budjet daromadlari 2023-yil yanvar oyida 14,9 trillion soʻmni tashkil qildi. Bu haqda Iqtisodiyot va moliya vazirligi axborot xizmati xabar berdi. 

Xabarga koʻra, yanvar oyining birinchi yarmida davlat budjeti daromad va xarajatlari oʻrtasidagi salbiy farq oyning birinchi haftasi davomida ish haqi, pensiya va ijtimoiy nafaqalarni toʻliq moliyalashtirish hamda yil boshida odatda budjet tushumlarining kam boʻlishi bilan izohlanadi. Yanvar oyida mamlakatda havo haroratining keskin sovib ketishi hamda energiya resurslariga talabning keskin oshishi tufayli xoʻjalik yurituvchi subyektlarga tabiiy gaz va elektr energiyasi yetkazib berishdagi uzilishlar ishlab chiqarish va xizmat koʻrsatish hajmlariga salbiy taʼsir qildi. 

Qayd etilishicha, bu qariyb 30 ming tadbirkorlik subyektlarining soliq qarzdorligini 1,2 trillion soʻmga oʻsishiga olib keldi va budjet tushumlarining toʻliq tushishiga salbiy taʼsir qildi. Ushbu sharoitda tadbirkorlik subyektlarini qoʻllab-quvvatlash maqsadida prezidentning 2023-yil 3-fevraldagi qarori bilan ularning soliq qarzdorliklari boʻyicha penya hisoblashni toʻxtatish, soliq qarzdorliklarini boʻlib toʻlash, moddiy javobgarliklarga tortmaslik, kredit toʻlov muddatlarini uzaytirish hamda aylanma mablagʻlarni toʻldirishga kredit olish shartlarini yengillashtirish kabi choralar belgilandi. Bu esa tadbirkorlik subyektlari faolligini qayta tiklashga va kelgusi oylarda budjet tushumlarini koʻpayishiga turtki boʻladi.

Maʼlum qilinishicha, budjet daromadlari 2022-yilning yanvar oyida 13,4 trillion soʻmni tashkil qilgan boʻlsa, 2023-yil yanvarida 14,9 trillion soʻmni tashkil qildi. Soliq qarzdorligi oshmagan taqdirda daromadlar oʻsish surʼatining yuqoriroq boʻlishi kutilgan.