O‘zbekistonda mahsulotlar eksporti bo‘yicha hozirgi 9 ta bosqichdan iborat bojxona rasmiylashtiruvi 3 barobar qisqartiriladi
O‘zbekistonda 2023-yilda ilg‘or tajribalar asosida soliq va bojxona ma’murchiligi tubdan isloh qilinadi. Bu jamoatchilik muhokamasiga qo‘yilgan 2023-yilgi davlat dasturi loyihasining 29-maqsadida ko‘zda tutilgan.
Qayd etilishicha, tadbirkorlik faoliyatini tashkil qilish va doimiy daromad manbalarini shakllantirish uchun sharoitlar yaratish, xususiy sektorning yalpi ichki mahsulotdagi ulushini 80 foizga va eksportdagi ulushini 60 foizga yetkazish maqsad qilingan.
Shu sababli soliq ma’murchiligi bo‘yicha ma’lumotlarni qayta ishlash markazi huzurida barcha soliq to‘lovchilarning shaxsiy kartochkalarini yuritishni markazlashtirgan budjet bilan munosabatlarni boshqarish direksiyasi Iqtisodiyot va moliya vazirligi va Soliq qo‘mitasining amaldagi shtat birliklari doirasida tashkil etiladi.
Shuningdek, soliqlarni o‘z vaqtida to‘layotgan intizomli soliq to‘lovchilar bo‘yicha “Ishonchli soliq to‘lovchisi reytingi” yuritiladi.
Iqtisodiyot va moliya vazirligi, Korrupsiyaga qarshi kurashish agentligi topshiriq ijrosi uchun mas’ul etib belgilandi.
Bundan tahqari, mahsulotlar eksporti bo‘yicha hozirgi 9 ta bosqichdan iborat bojxona rasmiylashtiruvi 3 barobar qisqartiriladi. “Eksport uch qadamda” – eksport bojxona yuk deklaratsiyalarini shakllantirishdan boshlab, rasmiylashtirishga qadar bo‘lgan barcha jarayonlarni o‘z ichiga qamrab olgan tizim joriy etiladi.
Bunda eksport operatsiyalarini quyidagi 3 bosqichda amalga oshirish nazarda tutiladi:
- eksport shartnomasini shakllantirish;
- tovar va transport hujjatlari asosida eksport deklaratsiyasini avtomatik shakllantirish;
- bojxona rasmiylashtiruvi va chegara nazorati.
