“Real” rahbariyatining Karlo Anchelottiga ishonchi pasaygan. Klublar o‘rtasidagi JCH murabbiy uchun hal qiluvchi bo‘lishi mumkin

Madridning “Real” klubi Ispaniya Superkubogida “Barselona”ga mag‘lub bo‘ldi va La Ligada kataloniyaliklardan 8 ochko ortda bormoqda.

Bu esa “Real” rahbariyatining bosh murabbiy Karlo Anchelottiga nisbatan ishonchi kamayishiga sabab bo‘lmoqda, deya xabar beradi Relevo.

Ispaniya Superkubogidagi mag‘lubiyatdan so‘ng rahbariyatning italiyalik mutaxassisga nisbatan ishonchi so‘nggan. Shu sababdan klublar o‘rtasidagi Jahon chempionati Anchelotti uchun hal qiluvchi musobaqaga aylanishi mumkin. Bunga nafaqat jamoaning natijalari, balki umumiy o‘yin holati ham sabab bo‘lgan. 

Anchelottining o‘zi ham rahbariyatning unga nisbatan munosabati o‘zgarganini bilgan holda, xato qilishga haqqi yo‘qligini bilib turibdi. “Real” unga qanday talablar qo‘yishini bilib turibdi. Shuningdek, murabbiy jamoa muvaffaqiyatsizlikka o‘z munosabatini ko‘rsatishi lozimligini sezmoqda. 

Anchelotti mavsum oxirida “Real”ni sovrinlar sari yetaklamoqchi.

Qishki transferlar oynasida birorta xaridni amalga oshirmasdan, tarkibdan mamnun ekanini aytgan bo‘lsa-da, Karlo 6 ta musobaqada 15-16 nafar futbolchiga tayanishi kerak bo‘lgan holatga tushib qoldi. Xususan, Anchelotti “Real” Karim Benzema bilan almashib o‘ynaydigan hujumchi sotib olishini xohlagan, ammo bu amalga oshmadi. 

“Real” 8-fevral kuni klublar o‘rtasidagi Jahon chempionati yarim finalida “Al-Ahli”ga qarshi bahs olib boradi. Uchrashuv 00:00 da start oladi.