O‘rta Chirchiqda 400 nafar o‘quvchi maktab binosi olib qo‘yilgani sabab darsga borolmayotgani xabar berildi. Zoir Mirzayev holatga eʼtibor qaratdi

Ijtimoiy tarmoqlarda Toshkent viloyatining O‘rta Chirchiq tumanidagi 20-maktab prezident maktabiga aylantirilgani, mahalliy aholi farzandlari boshqa hududdagi maktabga majburiy tarqatilgani haqida xabar berilgandi. Toshkent viloyati hokimligi mazkur muammoga munosabat bildirdi. 

“Ota-onalar esa bundan norozi, yaqinda 12 yoshli o‘quvchi qiz bilan sodir bo‘lgan mudhish voqeadan so‘ng qo‘rqib qolishgan. Shu voqea sabab 400 nafarga yaqin o‘quvchi maktabga bormayapti”, — deyiladi bu haqdagi xabarda.

Toshkent viloyati hokimligi mazkur muammoga viloyat hokimining shaxsan o‘zi eʼtibor qaratganini, Zoir Mirzayev topshirig‘iga ko‘ra voqea joyiga borgan tuman hokimi Ixtiyor Qosimov hamda viloyat hokimligi axborot xizmati rahbari Behzod Qobulov aholi bilan uchrashib, ularga tushuntirish berganini bildirdi.

“O‘rta Chirchiq tumani ‘Taraqqiyot’ MFYdagi 20-sonli umumtaʼlim maktabi tuman hokimi qarori asosida tugatilgan. Bino tuman ixtisoslashtirilgan maktabiga aylantirilgan. Taʼkidlash joizki, maktab joylashgan hududdan 1 km masofada 49-maktab joylashgan. O‘quvchilar shu maktabga ko‘chirilgan. Boshlang‘ich sinf o‘quvchilari esa o‘qishini avvalgi binoda davom ettiradi. Qo‘shimcha qilib aytamizki, joriy yil tuman investitsiya dasturi doirasida ‘Taraqqiyot’ mahallasi uchun alohida maktab binosi qurilishi rejalashtirilgan. Viloyat hokimi topshirig‘i bilan tuman hokimi Ixtiyor Qosimov, viloyat hokimining matbuot kotibi Behzod Qobulov joyiga chiqib, aholi bilan uchrashdi. Ota-onalarga holat bo‘yicha tushuntirish berildi”, — deyiladi hokimlik xabarida.

Qo‘shimcha qilinishicha, yuqori sinf o‘quvchilarining bir kilometr masofadagi maktabga qatnashi uchun avtobus ham ajratiladi.