Neymar o‘z faoliyatida 6-marta “Oltin samba” sovrinini qo‘lga kiritdi
“PSJ” hujumchisi Neymar 2022-yil yakunlariga ko‘ra “Oltin samba” mukofotini qo‘lga kiritdi.
“Oltin samba” mukofoti har yili mamlakatdan tashqarida to‘p suradigan braziliyalik futbolchiga beriladi.
6-fevral, dushanba kuni Neymar mukofot bilan tushgan rasmini Twitter tarmog‘iga joylashtirdi. Biroq, RMC Sport nashrining xabariga ko‘ra, natijalar 15-fevral kuni, ovoz berish jarayonlari yakunlanganidan ikki hafta o‘tgach, e‘lon qilinishi kerak edi.
“PSJ” hujumchisi ketma-ket uchinchi marta ushbu sovrinni qo‘lga kiritdi. Butun faoliyati davomida esa 6-marta “Oltin samba”ga ega chiqdi va bu borada rekord qayd etdi.
2021-yilga qadar “Oltin samba” Yevropada to‘p suradigan eng yaxshi braziliyalik futbolchiga berilar edi. Keyinchalik esa mamlakatdan tashqarida bo‘lgan barcha braziliyalik futbolchilar bu sovringa da’vogar bo‘lish huquqiga ega bo‘ldi. 2022-yil esa faqatgina Yevropada o‘ynaydigan braziliyaliklar sovrin uchun nomzodlar ro‘yxatidan joy olgan.
