Bayden Xitoy sharining urib tushirilishi AQSH—Xitoy munosabatlarini yomonlashtirmaganini aytdi

AQSH prezidenti Jo Baydenning fikricha, mamlakat havo hududiga kirgan Xitoy shari urib tushirilganidan keyin AQSH—Xitoy munosabatlari yomonlashgani yo‘q. Xitoy sharning yo‘q qilinishiga norozilik bildirgandi, Pentagon esa Pekinni strategik obyektlarni kuzatishda ayblagan.

Jurnalistlar Baydenga havo sharining yo‘q qilinishi Xitoy bilan munosabatlarni yomonlashtirdi, deb o‘ylaysizmi, degan savolni berdi.

“Yo‘q. Biz Xitoyga nima qilmoqchiligimizni aniq qilib bildirdik. Ular pozitsiyamizni tushunadi. Ortga qadam tashlamaymiz. Biz to‘g‘ri ish qildik va masala munosabatlarning zaiflashishi yoki mustahkamlanishi haqida emas, bu haqiqat”, — deb javob berdi Amerika rahbari.

Xitoyning havo shari yanvar oyi oxirida AQSH havo hududiga kirgan, qisqa muddatga Kanada chegarasini kesib o‘tgan, biroq keyin yana qaytib kelgan. Xitoy tomoni ta’kidlashicha, qurilma shamol tufayli yo‘nalishidan og‘ib ketgan meteorologik zond edi. Biroq Vashington sharni josus deb hisoblamoqda. Qurilma Jo Baydenning buyrug‘i bilan 4-fevral kuni havo-havo raketasi yordamida urib tushirildi. Pekin bu borada Vashingtonga norozilik bildirdi. Bu voqea ortidan Davlat kotibi Entoni Blinkenning Xitoyga tashrifi bekor qilindi.